Баянзүрх дүүргийн IX хороонд өнөөдөр коронавирусийн сэжигтэй тохиолдол бүртгэгджээ. Тодруулбал, тус хорооны "Энх-Энэрэл" өрхийн эрүүл мэндийн төвөөр үйлчлүүлж байсан нэг хүнээс түргэвчилсэн оношлуураар коронавирус илэрсэн гэх мэдээлэл цахим сайтуудаар цацагдсан юм.  Энэ талаар "Энх-Энэрэл" эрүүл мэндийн төвийн дарга Г.Ууганцэцэгээс тодруулахад "Өнөөдөр манай эмнэлэгт сэжигтэй тохиолдол бүртгэгдсэн нь үнэн. Тиймээс бид шинжилгээний хариу гарах хүртэл иргэдийг эмнэлэг дээр ирж үйлчлүүлэхгүй байхыг анхааруулсан. Бид өөрсдөө энэ тохилдлыг илрүүлээгүй. Үүнээс илүү мэдээлэл өгөх боломжгүй" гэв.

           Харин зарим эх сурвалж "Баянзүрх дүүргийн нэгдсэн эмнэлэгт хэвтэн эмчлүүлж байгаад гарсан иргэнээс авсан түргэвчилсэн оношлуурын хариу эерэг гарсан. Түүний ойрын хавьтлын 27 хүнийг ХӨСҮТ-д тусгаарлаад байна. Мөн тус эмнэлгийг тусгаарласан" хэмээж буй юм. ЭМЯ болон бусад албаны эх сурвалж уг мэдээллийг үгүйсгээгүй ч тодорхой мэдээлэл өгөхөөс татгалзлаа. Харин ХӨСҮТ-ийн нэгэн эх сурвалж "Тус иргэний пи си ар-ын шинжилгээний хариу эерэг гарсан нь үнэн" гэсэн юм. Энэ талаар бид эргэн мэдээлэх болно. 

Манай улсад коронавирусийн батлагдсан тохиолдол өнөөдрийн байдлаар 918 болсон. Үүнээс дотоодод халдвар авсан хүний тоо 473-т хүрээд байгаа юм.