Эрүүл мэндийн яамнаас коронавирусийн тархалтын талаарх ээлжит мэдээлэл хийлээ.

Энэ үеэр ХӨСҮТ-ийн Тандалт, судалгааны төвийн дарга А. Амбасэлмаа “ Өчигдөр 21470 хүнд шинжилгээ хийхэд Улаанбаатар хотын таван хүний шинжилгээнд коронавирус илэрлээ. Ингээд дотоодын халдвар 448 болж, Монгол Улсад коронавирусийн тохиолдол 898 боллоо. Эдгээр батлагдсан тохиолдол нь ойрын хавьтал бөгөөд дөрөв нь нэг гэр бүлийн гишүүд, нэг нь ХӨСҮТ-ийн сувилагч юм. 

Өнгөрсөн 24 цагийн хугацаанд голомт гарсан аймгуудад шинэ тохиолдол бүртгэгдээгүй. Улаанбаатар хотод 132, Дархан-Уул аймагт 45, Дорноговь аймагт 31, Орхон аймагт 25, Говьсүмбэр аймагт дөрөв, Сэлэнгэ 207, Архангай аймагт гурван тохиолдол бүртгэгдсэн хэвээрээ байна. Үүнээс 384 хүн буюу нийт тохиолдлын 43 хувь нь эдгэрч, 505 хүн эмчлэгдэж байна. Тэдгээрийн биеийн байдал хөнгөн 414, хүндэвтэр 84, хүнд зургаа, маш хүнд нэг байна. Коронавирус илрүүлэх цэгүүдэд нийт 369.282 хүн хамрагдсан байна" гэлээ.