Хүндэт харуулуудыг “Чингис хаан” музейн өмнө бэлтгэл хийж байх үед нь хуримаа хийж буй хосын зургийг зөвшөөрөлгүй дарж, олон нийтэд буруу ойлголт төрүүлжээ. Тодруулбал, эрх мэдэл, албан тушаалын байдлаа урвуулан ашиглаж, төрийн хүндэт харуул зогсоож "Хурим хийлээ" гэх ташаа мэдээлэл олон нийтийн сүлжээгээр цацагдсан. Энэ талаар Хүндэт харуулын 032 дугаар ангийн дарга, хурандаа Б.Болдбаатараас тодрууллаа.

     Тэрбээр “Маргааш манай улсад  Франц Улсын Ерөнхийлөгч Э.Макрон айлчлах юм. Айлчлалын хүрээнд тус улсын Ерөнхийлөгч “Чингис хаан” музейд зочилно. Үүнтэй холбоотойгоор хүндэт харуулууд хувцастайгаа бэлтгэл хийж байсан.  Бэлтгэл хийж байх үед нь хуримаа хийж байсан хосын зургийг хүмүүс зөвшөөрөлгүй дарж, олон нийтэд буруу ойлголт өгсөн байна. Бид төрийн ёслол хүндэтгэлийн арга хэмжээг журмын дагуу хийдэг. Хэн нэгний хуримын арга хэмжээнд оролцох хууль, журам байхгүй. Хүндэт харуулуудыг бэлтгэл хийж байх үед энэ мэтчилэн асуудлууд гардаг. Тухайлбал, морьтой бэлтгэл хийж байхад машинтай хүмүүс зураг авч, дайрчих гээд хэцүү байдаг” гэв.