ЭЦА-наас өчигдөр Гаалийн Ерөнхий газрын эрх бүхий албан тушаалтнуудын гэрт болон ажлын байранд шалгалт хийж, их хэмжээний бэлэн мөнгө, доллар хурааж авсан гэх мэдээлэл бий. Энэ талаар Гаалийн Ерөнхий газрын Гаалийн зөрчилтэй тэмцэх хэрэг бүртгэлийн газрын албаны даргаас тодрууллаа.

    Тэрбээр “Бидэнд Гаалийн Ерөнхий газарт хяналт, шалгалт хийсэн гэх албан ёсны мэдээлэл хууль хяналтын байгууллагаас ирээгүй байна. Албан бус мэдээллээр дээрх шалгалтыг зөвхөн Гаалийн байгууллагын алба хаагчдад хийгээгүй. Өмнөговь аймгийн Гашуун сухайтын нүүрс ачиж, буулгах талбайн үйл ажиллагаатай холбогдох албан тушаалтнууд, тухайн орон нутгийн цагдаа болон хилийн цэргийн алба хаагчид гээд 4-5 хүний орон байр, ажлын өрөөнд нь хяналт, шалгалт хийсэн байна.

Харин Гаалийн байгууллагын нэг албан хаагчийн гэрт хяналт, шалгалт хийсэн. Манай байгууллагатай холбогдох тус албан тушаалтан 2-3 сарын өмнө ажлаасаа халагдсан. Учир нь, Гаалийн улсын байцаагчийн ёс зүй алдаж, сахилгын зөрчил гаргасан гэж үзээд түүнд албаны дотоод хяналт, шалгалт хийсэн. Шалгалтын дараа Гаалийн тухай хуулийн дагуу ажлаас нь чөлөөлж, сахилгын шийтгэл ногдуулж, хуулийн байгууллагад тус хүнийг “Шалгаж өгөөч” гэж хандсан.

Үүний дагуу манай байгууллагад хяналт, шалгалт хийсэн гэж ойлгож байгаа. Тус ажилтан Өмнөговь аймгийн Гашуун сухайт дахь Гаалийн газарт ахлах байцаагчаар ажиллаж байсан. Түүний гэрээс их хэмжээний бэлэн мөнгө гараагүй юм билээ. Харин нүүрс ачих, буулгах талбайд ажилладаг албан тушаалтны холбогдох байрнаас их хэмжээний мөнгө хурааж авсан гэх мэдээлэл бий” гэлээ.