Ш.БААСАНДОРЖ: Сэлэнгэ голд машинтайгаа живсэн байж болзошгүй гурван иргэнийг эрэн хайж байна

Э. Энхмаа:
Монголчуудын амьдрал- Мэдээ мэдээлэл

2022-04-13, 522

Булган аймгийн Сэлэнгэ сумын Тариахтай багийн Харлагийн гол гэдэг газар гурван зорчигчтой Портер загварын автомашин Сэлэнгэ голын усанд унасан байж болзошгүй тухай мэдээллийг Булган Цагдаагийн газраас өчигдөр 12:53 цагт Онцгой байдлын байгууллагад мэдээлэлж, хүсэлт ирүүлжээ.

Энэ хэрэгтэй холбоотойгоор Булган аймгийн Онцгой байдлын газрын дарга Ш.Баасандоржоос тодруулсан юм. Тэрбээр “Өчигдөр Булган аймгийн Цагдаагийн газраас манай байгууллагад хүсэлт ирсэн. Бид уг хүсэлтийн дагуу шуурхай ажиллагааг зохион байгуулан ажиллаж байна.

Алга болсон байж болзошгүй 47 настай “С”, “А” болон тэдний хүүхэд зургаан настай “Б” нар гурав хоногийн турш алга болсон гэдэг мэдээлэл анх цагдаагийн байгууллагад ирсэн байсан.

Үүнтэй холбоотой Булган аймгийн Онцгой байдлын газрын Гал түймэр унтраах, аврах 50 дугаар ангийн алба хаагчид 134 км замыг туулан 14:56 цагт очиж Портер загварын автомашинтай алга болсон гурван иргэнийг Сэлэнгэ гол, Харлагын голын адаг гэдэг газраас зүүн зүгт Номт гэдэг газар хүртэл найман км-т усаар завьтай урсаж, голын эрэг дагуу явганаар болон шумбаж эрэн хайх ажиллагааг зохион байгуулсан. Эрэн хайх ажиллагааг мөн өдрийн 18:49 цагт түр зогсоогоод өнөө өглөө 08:00 цагт дахин эхлүүлсэн. Өнөөдөр дахин нэмэлт баг гаргаж ажиллахаар болсон. Энэ хэрэгт нийтдээ есөн алба хаагч ажиллаж байна. Мөн эрэн хайх, аврах ажиллагааны зохих журмын дагуу буюу цөн түрсэн энэ үед завьтай эрэн хайх ажиллагааг хориглодог учраас явган болон шаардлагатай газруудад шумбалт хийж аврах ажиллагааг зохион байгуулж байна. Өнөөдрийн байдлаар цас орсон учраас харагдах орчин хязгаарлагдмал байна. Гэсэн хэдий ч бид эрэн хайх аврах ажиллагааг үргэлжлүүлж байгаа” гэлээ.

Ш.БААСАНДОРЖ: Сэлэнгэ голд машинтайгаа живсэн байж болзошгүй гурван иргэнийг эрэн хайж байна