Шатахууны үнэ дахин 300 төгрөгөөр нэмэгдлээ. Тодруулбал, “Петровис”, “Магнай трейд” зэрэг компаниуд АИ-92 автобензин үнийг 2050 төгрөг болгожээ. Шатахууны үнэ долдугаар сарын 3-нд 300 төгрөгөөр нэмэгдэж, 1750 төгрөг болж байсан. Түүнээс өмнө шатахуун импортлогч компаниуд зургадугаар сарын 11-нд Уул уурхай хүнд үйлдвэрийн яаманд шатахууны үнийг литр тутамд 600 төгрөгөөр нэмэх санал гаргаж байсан билээ. Тухайн үед Засгийн газрын хуралдаанаар нийт иргэдийн 60 хувь дархлаажуулалтдаа бүрэн хамрагдсаны дараа шатахууны үнийг үе шаттайгаар нэмэхээр холбогдох байгууллагуудтай тохиролцсон. Тэгвэл өнөөдрийн байдлаар нийт хүн амын 61 хувь дархлаажуулалтад бүрэн хамрагдаад байна. Нөгөөтээгүүр ОХУ манай улсад есдүгээр сарын 1-н хүртэл шатахуун нийлүүлэхээ зогсоосон бөгөөд дэлхийн зах зээл дээр газрын тосны үнэ тасралтгүй нэмэгдэж байгаа. Мөн манай улс 45 хоногийн шатахууны нөөцтэй байна.