Сүүлийн жилүүдэд байгалийн өнгөт болон үнэт чулууг хууль бусаар олборлож, хил гаргах явдал ихсээд байгаа. Тухайлбал, 2018 онд Хэнтий аймгийн Батноров суманд хууль бус чулуу түүгчид олширч, тэдэнтэй тэмцсэн сумын  хуучин Засаг дарга Г.Тайванжаргал хүнд гэмтэж байсан билээ. Батноров суманд хууль бус чулуу түүгчдийн асуудал ямар хэмжээнд байгаа талаар тус сумын байгаль орчны байцаагч Б.Өсөхбаяраас тодрууллаа.

---

              Тэрбээр “Байгалийн өнгөт чулууг хууль бусаар олборлогчид 2014 оноос манай суманд бий болсон. Анх Хутаг ууланд чулуу түүсэн хүмүүс яваад байна гэдэг мэдээллийг аваад газар дээр нь очиж, үйл ажиллагааг нь таслан зогсоох гэж тэмцсэн. Тухайн үед Захиргааны хариуцлагын тухай хуулиар тэдгээр хүнийг 50 мянган төгрөгөөр торгодог байсан. Сүүлдээ энэ нь даамжраад дийлдэхээ байгаад 400-500 хүн чулуу түүхээр ирсэн. Долоон аймгийн 27 сумын амьдралын боломжгүй, ажилгүй хүмүүс цугларсан байсан. Одоо бол чулуу түүгчид эрс багассан. Хүмүүсийн их хэмжээгээр түүдэг “Ёндоо”, “Шөрмөс” чулуу манай сумын зүүн, баруун хойд хэсгээр ихэвчлэн байдаг. Нэг чулуу нь 50-1.2 сая хүрэх үе ч байсан. Одоо бол тэр чулуунууд нь багассан болохоор хүмүүсийн хөдөлгөөн ч татарлаа. Манай сумын хуучин Засаг дарга сайн тэмцдэг байлаа. Харамсалтай нь, чулуу түүгчдийн халдлагад өртөж, баруун нүд нь 25 хувийн хараатай болсон учир хүнд ажил хийх боломжгүй болсон. Одоогийн Засаг дарга маань ч хуулийн дагуу шаардлагатай арга хэмжээг авч ажиллаж байна” гэлээ.