Зам засварын ажил гүйцэтгэж байсан “Ялгуусан” ХХК-ийн механизмчид индүүдлэгийн машинаар нэгнийгээ дайрч, амийг нь хөнөөсөн хэрэг өчигдөр гарсан. Тодруулбал, Баянзүрх дүүргийн нутаг дэвсгэр Замын цагдаагийн гүүр орчим өчигдөр 15:00-16:00 цагийн орчимд тус хэрэг болжээ. Бид энэ талаар тус компанийн ерөнхий инженер болон Хөдөлмөрийн аюулгүй байдлын инженертэй холбогдож дараах мэдээллийг тодрууллаа.

Н.БЯМБАХҮҮ: ТАЛИЙГААЧИЙН НҮҮР ХҮН ХАРАХЫН АРГАГҮЙ БОЛЧИХСОН БАЙСАН

                Ослын талаар тус компанийн ерөнхий инженер н.Бямбахүүгээс тодруулахад “Манай компани замын ажлаа дөнгөж өчигдрөөс эхэлсэн. Замын цагдаагийн гүүр орчим дөрвөн механизмчин, гурван замчин, усны жолооч, инженер гээд арав орчим хүний бүрэлдэхүүнтэй баг ажиллаж байгаа. Би замын ажлын эхлэлтэй танилцахаар тухайн газар очсон байсан. Шалгаж явахад наагуур тийм зүйл болсон байна лээ. Өчигдөр 15:00-16:00 цагийн орчим манай ажилтан ажил гүйцэтгэх явцдаа индүүдлэгийн машин доогуур орж нас барсан харамсалтай осол гарсан. Талийгаач 40 гаруй настай эрэгэтэй хүн байсан. Манай компанид 10 орчим жил ажиллаж байгаа мэдлэг чадвар, сайн туршлагатай хүн байлаа. Тухайн үед талбайн инженерээр н.Эрдэнэтбат, зам хариуцсан инженерээр н.Баттөр нар талбайд ажиллаж байсан. Талийгаачийн нүүрийг хальт харахад хүн харахын аргагүй болчихсон байсан. Манай хоёр ажилтан өөр хоорондоо өс санасан, зөрчилдсөн зүйл байгаагүй. Эвтэй сайн ах, дүүс байсан” гэв.

Манай компанид 10 орчим жил ажиллаж байгаа мэдлэг чадвар, сайн туршлагатай хүн байлаа

Бид осол болох үед тус талбайд ажиллаж байсан талбайн инженер н.Эрдэнэбат, замын инженер н.Баттөр нараас ослын талаар тодруулахыг хүссэн боловч мэдээлэл өгөхөөс татгалзсан юм.

Н.СҮХБААТАР: БИ ЮУ Ч ХЭЛЭХГҮЙ, ЯМАР Ч МЭДЭЭЛЭЛ ӨГӨХГҮЙ

Харин тус компанийн Хөдөлмөрийн аюулгүй байдлын инженер н.Сүхбаатараас тодруулахад, 

-Сайн байна уу, таны хариуцаж байсан газар ноцтой осол гарчээ. Осол юунаас болж гарсан юм бэ?

-Энэ та нарт ямар хамаатай юм бэ. Би ямар ч мэдээ мэдээлэл өгөхгүй.

-Та “Ялгуусан” ХХК-ийн ХАБ-ийн инженер хүн. Тэгэхээр энэ таны хариуцлага алдсан үйлдэл биш үү?

-Битгий дэмий донгос. Мэдээлэл өгөх, үгүй нь миний эрх. Би юу ч ярихгүй.

-Та бүхэл бүтэн байгууллага төлөөлсөн, тэр дундаа хөдөлмөрийн аюулгүй байдлыг хариуцсан инженер хүн шүү дээ. Тэгэхээр таниас мэдээлэл авах нь зөв байх?

-Надад хэлэхгүй байх эрх мэдэл байна. Би өөрөө хуульч хүн шүү, битгий олон юм ху.аад байгаарай.

“ЯЛГУУСАН” ХХК  НЬ 200 САЯ ТӨГРӨГИЙН АВЛИГА АВСАН ХЭРЭГТ ХОЛБОГДОГЧ Л.САНЖААДОРЖИЙНХ 

          Лхамжавын Санжаадорж нь 2006 оны тавдугаар сарын 30-нд “Ялгуусан” компаниа байгуулж, хуулийн этгээдээр бүртгүүлсэн байна. Тус компани 2009-2038 хүртэл Зам, барилгын үйлдвэрлэл, засвар гэх үндсэн чиглэлээр үйл ажиллагаа явуулах зөвшөөрөл авсан байдаг. Үүнээс гадна ашигт малтмал хайгуул, ашигт малтмал ашиглах, гадаад худалдаа, авто зам, замын байгууламжийг барих, засвар чиглэлээр ч мөн зөвшөөрөл авчээ. Харин тус компанийн захирал Лхамжавын Санжаадорж сайд асан Д.Ганбаттай нэр холбогдон Эрүүгийн хэрэгт яллагдагчаар татагдаж байсан удаатай. Тодруулбал, Зам тээврийн хөгжлийн сайд асан Д.Ганбат нар 420 сая төгрөгийн хохиролтой, 200 сая төгрөгийн хахуулийн хэрэгт холбогдсон байдаг.