Монгол Улсын Засгийн газрын 2020-2024 оны үйл ажиллагааны хөтөлбөрт туссан өсөн нэмэгдэж буй эрчим хүчний хэрэглээг хангах зорилготой “Багануурын дулааны цахилгаан станц” төслийг хэрэгжүүлэх концессын гэрээний дагалдах гэрээ болох “Цахилгаан эрчим хүч худалдах, худалдан авах” гэрээг өнөөдөр байгууллаа.

Нэмэлт гэрээнд 200 МВт (МегаВатт)-ын хоёр блок буюу 400 МВт хүчин чадалтай байхаар тусгалаа. Эхний ээлжинд I блокыг 2026 оны долдугаар сарын 1, II блокыг мөн оны аравдугаар сарын 1-ний дотор ашиглалтад өгөхөөр тусгасан байна.

Барилга угсралтын ажлыг дөрвөн жил гүйцэтгэж Концессын гэрээний дагуу концесс эзэмшигч 21 жил ашигласны дараагаар Монгол Улсад хүлээлгэн өгөх юм

Өмнөх цахилгаан эрчим хүч худалдах, худалдан авах гэрээнд тусгагдаж байсан “Take or Pay” зарчмаас татгалзаж чадсанаараа системд илүүдэл эрчим хүч нийлүүлэх болон Монгол Улсын төсөвт нэмэлт дарамт үүсэх нөхцөл байдал арилж байна. Төвийн бүсийн эрчим хүчний системийн найдвартай хэвийн үйл ажиллагааг хангахад чухал ач холбогдолтой. Мөн дулааны цахилгаан станцын шаардлагатай нүүрсийг Багануурын нүүрсний уурхай нийлүүлснээр уурхайн санхүү, эдийн засгийн чадамж нэмэгдэх юм.

Нэмэлт гэрээнд Эрчим хүчний сайдын зөвлөмж, чиглэлийн дор эрчим хүчний системийн технологи удирдлагын төв болох “Диспетчерийн Үндэсний Төв” ХХК, “Цахилгаан дамжуулах үндэсний сүлжээ” ТӨХК, “Багануур пауэр” ХХК гурван талаас зурж баталгаажууллаа.