-Төрдөө үнэгүйдсэн монгол хүний амь түмэндээ хэчнээн чухал гэдгийг бид хамтдаа харлаа-

               Сайхан сэтгэлтэй юм аа, Монголын ард түмэн. Самарт яваад  дөрвөн сар орчим сураггүй алга болсон дөрвөн иргэнийг санаа нийлээд хоёрхон өдрийн дотор олоод ирлээ. 

            Өр зээлээ төлж, амьдрал ахуйгаа сайжруулах гэж Сэлэнгэ аймгийн Хүдэр, Ерөө, Зүүнхараа сумыг зорих “борчууд”-ын цуваа үл тасарна. Орсон л бол гарах зам нь бүү хэл, ойр орчим нь ч үл харагдах хушан ой дундуур хөнжил, пүүгээ, зуух, яндангаа үүрсэн иргэд цуваа үүсгэн, отоглох газар хайж, хэчнээн километр газар алхана. Тэд намрын налгар өдрөөс эхлээд дүн өвлийг хөвч ойд өнгөрүүлж, хавартаа золгоно. Тэнд жижигхэн сумын төвөөс ч илүү амьдрал өрнөнө. Яг л ийм дүр төрхтэй самарчдын дөрөв нь гэр бүлийнхээ төлөө даарч, хөрөхийг үл ажран явсаар сураггүй алга болсон.  Асга хад, үерлэсэн гол, хөвч тайга дундаас тэднийг олоход хүндрэлтэй байгаа учир ар гэрийнхэн нь арга буюу 50 сая төгрөгөөр онгоц түрээслэн, таван удаа хайсан боловч эрэл мухардсан юм.

        Уг нь үүнээс эрт олох боломжтой байсан ч төр иргэнийхээ төлөө хөдлөөгүй. Тодруулбал, сураггүй болсон иргэдийн ар гэрийнхэн нь Онцгой байдлын ерөнхий газарт нисдэг тэргээр тусламж үзүүлэх хүсэлт тавихад “Нисдэг тэрэг нэг цагийн 4.5 сая төгрөг байдаг. Дөрвөн цаг хөлслөх юм бол 21 сая төгрөг шаардлагатай” гэх хариу өгчээ. Иймд ар гэрийнхэн нь сайхан сэтгэлт монголчуудаас хандив хүссэн. Нисдэг тэрэг хөлслөхөд шаардлагатай 21 сая төгрөгийг Монголын ард түмэн хоёр хоногийн дотор л цуглуулж, өчигдөр дөрвөн иргэнээ эсэн мэнд олж, ар гэрт нь хүлээлгэж өгсөн юм. Цар тахлаас үүдэн жил гаруй хугацаанд хойд хормойгоороо урд хормойгоо нөхөж, өдөр хоногийг аргацааж байгаа хөөрхий монголчууд л тэднийг олохын төлөө талхны мөнгөө илүүчилсэн. Тийм ээ, монголчууд чадах, чадахынхаа хэрээр хандив цуглуулж дөрвөн гэр бүлийг элэг бүтэн, дөрвөн ээж, аавыг үр хүүхэдтэй нь, дөрвөн хүнийг ханьтай нь, хэдэн хүүхдийг ээж, аавтай нь үлдээж чадлаа. Гэтэл "Би ард түмнээ нүдний цөцгий мэт хайрлана" хэмээн "сонгуульдаж" явсан Ерөнхийлөгч У.Хүрэлсүх "бүлх залгичихсан" мэт чимээгүй байсаар л. Улстөрчдийг шил дараалан Токиогийн олимпыг зорьж байхад Монголын ард түмэн нэгнийгээ аварч байна. 

           Борчууд нь амьдрахын тулд уулын модонд эр, эмгүй шуудай самрыг хэд хэдээр нь үүрч, халуун, хүйтнийг үл ажран хээрээр хоног төөрүүлэн, төөрч будилж явахад иргэндээ үйлчлэх нисдэг тэрэгний зардалгүй ядуу улсын баячууд морио нисдэг тэргээр дагаж байхад борчууд нь борчууддаа туслахаар хэдэн бор төгрөгөө илүүчилж сууна. Төрдөө үнэгүйдсэн монгол хүний амь түмэндээ хэчнээн чухал гэдгийг бид хамтдаа харлаа.