Төрийн худалдан авах ажиллагааны цахим системийн “Цахим дэлгүүр”-т Ерөнхий боловсролын сургуулийн I-XII ангийн 149 нэрийн сурах бичиг, дөрвөн нэрийн Багшийн журнал, 12 нэрийн оюуны хөгжлийн бэрхшээлтэй сурагчдын сурах бичиг, багшийн номыг барааны жагсаалтад оруулжээ. Ингэснээр Ерөнхий боловсролын сургуулиуд сурах бичгээ  шууд захиалж, хэвлүүлэх боломжтой болж байгаа юм. 

   Уг "Цахим дэлгүүр"-ээс захиалга хийхэд сурах бичгийн багцийн нэг хуудасны үнийн санал 20-94 төгрөгийн хооронд байна. Сурах бичгийн багцийн тендерийг “Соёмбо принтинг”, “Сэлэнгэ пресс”, “Адмонпринт”, “Бэстколор Интернэшнл”, “Битпресс”, “Содпресс”, “Мөнхийн Үсэг” хэвлэлийн компаниуд авчээ.  Мөн албаны хүн “Энэ жил сурах бичгийн агуулгыг өөрчлөөгүй” гэлээ.

   Ерөнхий боловсролын сургуулиуд "Цахим дэлгүүр"-ээс сурах бичгээ шууд худалдан авах нөхцөл бүрдсэнээр хэвлэлийн тендерийг гурван жилд нэг удаа зохион байгуулж, цаг хугацаа хэмнэх боломжтой болсон аж. 

   Төрийн худалдан авах ажиллагааны цахим системийн “Цахим дэлгүүр”-т өмнө нь зөвхөн эм, эмнэлгийн хэрэгсэл борлуулдаг байсан.

Б.БАДАМЗУЛ