Монгол Улсын Шадар сайд С.Амарсайхан Эм, эмнэлгийн хэрэгслийн хяналт, зохицуулалтын газарт  хяналт шалгалт хийж ажиллалаа. Энэ үеэр эм эмнэлгийн хэрэгслийн хангамж, нэг удаагийн лицензийн зөвшөөрлийг хэрхэн олгож байгаа, эмийн чанар зэрэг асуудлаар тодруулж ажиллсан байна. Тэрбээр “Эрүүл мэндийн яамнаас мэдээлснээр сүүлийн  жил гаруй хугацаанд эм ханган нийлүүлсэн хоёр компани байна. Өнгөрсөн жилд  180 мянган төгрөгөөр нэг ширхгийг нь бөөний төвд нийлүүлж байсан эмийг одоо 300 мянган төгрөгөөр худалдаж авдаг болсон” тухай онцолж хэлсэн юм.

      Эм эмнэлгийн хэрэгслийн хяналт зохицуулалтын газраас өнгөрсөн гурван сарын хугацаанд 11.1 тэрбумын  оношлуур худалдаж авсан. Ойрын хугацаанд мөн ижил хэмжээний оношлуур нийлүүлнэ.

   Энэ үеэр Эм, эмнэлгийн хэрэгслийн хяналт зохицуулалтын газрын Б.Цэцэгсайхан: “Энэ оноос оношлуурын хувьд худалдан авалтаа ерөнхий гэрээний дагуу хийхээр төлөвлөж байгаа. Ингэснээр улсын хэмжээнд PCR, түргэвчилсэн оношлуур, “Ковид-19”-ийн үед хэрэглэх гурван вирусийн эсрэг эм тариаг нэгдсэн байдлаар худалдан авалт хийх боломжтой юм. Тендерийн эрх нь долоон сарын 26-нд нээгдэнэ. Ерөнхий гэрээгээр хийгдсэн худалдан авалт  үнэ  хямд, илүү чанартайг авах боломжийг бүрдүүлж байгаа.

   Хамгийн сүүлд ДЭМБ-аас долоон сарын 6-нд тоцилизумаб эсрэг биеийг   “Ковид-19”-ийн эсрэг хэрэглэхэд үр дүнтэй хэмээн үзсэн байдаг. Бид Америкийн компаниудтай  холбогдож  тус эмийн талаар судалсан. Тодруулбал, Дэлхийн зах зээлд тус эмийн олдоц муу байдаг. Өчигдрийн байдлаар Монгол улсад 2000 ширхэг эмийг өгөх боломжтой гэж хэлсэн. Энэ нь 400 орчим тун болох бөгөөд нэг бүрийн үнэ 315 мянган төгрөг  болно. Иймээс ойрын хугацаанд 630 сая төгрөгийн худалдан авалт хийхээр төлөвлөж байна. Эмийн сайн нөлөө нь коронавирусээр хүнд өвдсөн иргэдийн нас баралтыг 13 хувиар бууруулдаг. Үүгээр зогсохгүй уушги орлуулагч аппаратад орох хэрэгцээг 28 хувиар бууруулах аж. Энэ жил эмийн үнийн хувьд үйлдвэрлэгч тус бүрийн үйлдвэрлэх нөөцийн хэмжээ, тухайн компани болон гаргаж худалдах  хэмжээ нь өөр байгаа учир үнийн хувьд зөрүүтэй байгаа.

  Эм эмнэлгийн хэрэгслийн хяналт зохицуулалтын газартай нийт 34 аж ахуй нэгж  вирусын эсрэг эмийг оруулж ирэх талаар хүсэлт өгсөн байгаа. Үүнээс бүгдэнд нь зөвшөөрлийг олгон,  26 аж ахуй нэгжтэй санамж бичиг байгуулж үнийг дээд хязгаарын мөрдүүлэн ажиллаж байна” гэсэн юм.

Н.АРИУНСАЙХАН