Засгийн газар, УОК-ын шийдвэрийн дагуу экспорт, импортын гол боомтыг ногоон бүс болгох зорилгоор ачаа тээврийн Цагаан хад суурьшлын бүсэд хатуу хөл хорио тогтоосонтой холбогдуулан ЦЕГ-ын дэд дарга, цагдаагийн хурандаа О.Амарсанаагаар ахлуулсан ажлын хэсэг, Өмнөговь аймгийн Онцгой комиссын гишүүд тус суурьшлын бүсэд ажиллаж байна.

Ажлын хэсгийн бүрэлдэхүүн PCR шинжилгээний явуулын таван баг гарган суурьшлын бүсэд байгаа бүх иргэнийг шинжилгээнд хамруулах ажлыг зохион байгуулж байна.

Түүнчлэн тус бүсэд үйл ажиллагаа явуулдаг 30 аж ахуйн нэгжийн 19 тусгаарлан ажиглах байранд хяналт тавьж, халдвар хамгааллын дэглэмийг сахиулах зөвлөмж өгч, урьдчилан сэргийлэх халдваргүйжүүлэлтийг тогтмол хийлгэж байгаа юм.

Мөн Цагаан хад суурьшлын бүс рүү нэвтрэх хоёр шалган нэвтрүүлэх цэг дээр шинжилгээ авах суурин цэгийг шинээр байгуулжээ.

Ханбогд сумын Хайрхан багийн төвд зургаан цагт 150 сорьцод шинжилгээ хийх хүчин чадал бүхий 24 цагаар ажилладаг лаборатори. Түүнчлэн аймгийн Цагдаагийн газар, Онцгой байдлын газар, Хилийн 0131 дүгээр анги, Автотээврийн төвөөс хяналтын 26 цэг, хөдөлгөөнт эргүүлийн таван чиглэлд 124 албан хаагч хоёр ээлжээр 24 цагаар автотээврийн болон иргэдийн хөдөлгөөнд хяналт тавин ажиллаж байна.

Цагаан хад суурьшлын бүсэд энэ сарын 18-ны байдлаар 1571 тээврийн хэрэгсэл нүүрс тээвэрлэлт хийгээд байна гэж УОК-ын Шуурхай штабаас мэдээллээ.