Монгол Улсын Консерватор буюу хуучнаар Хөгжим бүжгийн коллежийн газарт Боловсролын үнэлгээний төвийн барилга барихаар 59х17 мкв талбайг хашаалаад байгаа. Гэвч тус сургуулийн багш, сурагчид газраа өгөхийг эсэргүүцэн түр хороо байгуулж энэ сарын 8-наас эхлэн тайван жагсаал хийж буй. Тэдний зүгээс Боловсрол шинжлэх ухааны яам зэрэг холбогдох байгууллагуудад албан шаардлага хүргүүлсэн. Тэгвэл долдугаар сарын 19 буюу өнөөдөр Боловсрол, шинжлэх ухааны сайд Л.Энх-Амгалан түр хорооны гишүүд, төлөөлөлтэй уулзлаа.

       Энэ үеэр БШУ-ны сайд Л.Энх-Амгалан “Өнөөдөр бөмбөр, бүрээ, жагсаал тэмцэлтэй өдөр болж өнгөрлөө. Энэ асуудалтай холбоотой мэдээлэл их дутмаг байна. Учир нь Монгол Улсын Консерваторын удирдлагууд өнгөрсөн тавдугаар сард Боловсрол, шинжлэх ухааны яамтай гэрээ байгуулсан. Энэ гэрээ байгуулагдсан талаарх мэдээлэл дутмаг байгаа нь цар тахал болон баг, сурагчдын амралт таарсантай холбоотой байх.

Боловсрол, шинжлэх ухааны яамнаас Монгол Улсын Консерваторыг цаашид “campus” буюу оюутны хотхон байдлаар хөгжүүлэхээр шийдвэрлэж, сургуулийн удирдлагуудтай зөвшилцөлд хүрсэн. Энэ төлөвлөгөөгөөр ашиглалтын хугацаа нь дууссан 650 хүүхдийн сургуулийн барилгыг шинээр барьж, цаашид зориулалтын концертын болон спорт заал, номын сан, багш нарын хөгжлийн төв гэх мэт олон функцтэй хотхон болгох зорилгоор ерөнхий макетийг нь гаргасан байгаа. Гэтэл газраа өгөхийг эсэргүүцэж буй багш, сурагчдыг хулгайлагдсан газрыг нь авчирч өгсний төлөө тэмцэж байна гэж дүгнэж байгаа. Боловсролын яам хууль бусаар бусдад хулгайлагдсан 0.3 га газрыг Консерваторын эзэмшилд буцаан авчирсан. Мөн шинэ сургууль барих газар буюу та бүхний эсэргүүцээд байгаа талбайд Монгол Улсын Циркийн сургууль барих төлөвлөлттэй юм байна лээ. Циркийн сургууль Дашчойлин хийдийн хашаатай залгаа газарт бас 0.3 га газартай. Үүнийгээ мөн л бусдад алдсан. Ахмад циркчдын холбоо гэдэг нэрийн дор хувь хүн тэр газрыг эзэмшдэг. Үүнийг Боловсролын яамнаас буцаан авч Консерваторын газарт шилжүүлсэн. Энэ газарт хоёр тэрбум төгрөгийн хөрөнгө оруулалтаар циркийн стандарт барилга барих тохиролцоонд хүрсэн. Тодруулбал, циркийн барилга Дашчойлин хийдийн хашаатай залгаа газарт, Боловсролын үнэлгээний төвийн барилга 15 тэрбум төгрөгийн өртгөөр Консерваторын хашаанд барих тухай гэрээнд тусгасан. Энэ тухай мэдээллийг багш, ажилчид, сурагчдад дутуу өгсөн байна” гэв.