Ард иргэдийнхээ эрүүл, аюулгүй байдал, энх амгаланг сахиулах үйлсэд мэдлэг чадвар, бие сэтгэлээ зориулан хүчин зүтгэж буй Цагдаагийн байгууллагын үе үеийн ахмад буурлууд, тэдгээрийн залгамж халаа болсон алба хаагчид, олон улсын энхийг дэмжих ажиллагаанд улс, эх орноо төлөөлөн оролцож байгаа энхийг сахиулагчид, тэдний гэр бүлд Эргэлт.мн мэдээллийн сайтын редакцаас Монгол Улсад Цагдаагийн байгууллага үүсэж, хөгжсөний түүхт 100 жилийн ойн мэнд хүргэж байна.

         Монголын Цагдаагийн байгууллага тэртээ 1921 онд байгуулагдаж байжээ. Тодруулбал, Ардын засгийн газрын шийдвэрээр “Сэргийлэх цэргийн салаа” нэртэйгээр тулгын чулуугаа тулснаас хойш өнөөдрийг хүртэл нэгэн зууны их түүхийг бичсэн байна. Энэ түүхэн цаг хугацаанд Монгол төрийн цагдаа, Дотоодын цэргийн байгууллага нь гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах үндсэн чиг үүргээ нэр төртэй биелүүлж ирсэн юм.

         Цагдаагийн албаны амаргүй ажил, улс эх орны хөгжилд оруулсан үнэтэй хувь нэмрийг нь Монголын төр засаг өндрөөр үнэлж, “Байлдааны гавьяаны улаан тугийн одон”, “Сүхбаатарын одон”-гоор тус тус шагнаж байлаа.

Төр төвшин, түмэн олон амар амгалан байж, Монгол төрийн цагдаагийн сүлд хийморь мандан бадрах болтугай.

ЭРГЭЛТ.МН МЭДЭЭЛЛИЙН САЙТ

Чөлөөндөө гарсан болон одоо ажиллаж байгаа офицер, ахлагч, түрүүч, сонсогч нартаа ажлын өндөр амжилт хүсье.