Батлан хамгаалахын дэд сайд Б.Баярмагнай эх орноо төлөөлөн “Токио- 2020” олимпод оролцох "Алдар" спорт хорооны баг, тамирчдад амжилт хүсэж, гарын бэлэг дамжуулжээ.

Энэ сарын 23-нд эхлэх "Токио-2020" олимпын наадамд Монголын тамирчид байт харваа, буудлага, бокс, жүдо, чөлөөт бөх, 3x3 сагсан бөмбөг, усанд сэлэлт, одон бөмбөг, хөнгөн атлетик, хүндийн өргөлт гэсэн спортын 10 төрөлд 43 эрх аваад байгаа юм.

Үүнээс БХЯ-ны харьяа “Алдар” спорт хорооноос спортын долоон төрлөөр 12 тамирчин эрхээ баталгаажуулаад байна. Тухайлбал, буудлагын төрлөөр Монгол Улсын Хөдөлмөрийн баатар, Гавьяат тамирчин, дэд хурандаа О.Гүндэгмаа, ОУХМ, ахлагч Э.Даваахүү, байт харвааны төрлөөр ОУХМ, ахлагч Б.Отгонболд, марафоны төрөлд ОУХМ, дэд ахлагч Б.Мөнхзаяа, ОУХМ, ахлах ахлагч Ц.Бямбажав, боксын төрөлд ОУХМ, ахлах ахлагч Б.Чинзориг, паратаеквондоогоор ОУХМ Х.Энхтуяа, ОУХМ Г.Болор-Эрдэнэ, хүндийн өргөлтөөр МУГТ ахлах дэслэгч М.Анхцэцэг, жүдо бөхийн төрлөөр ОУХМ, дэслэгч Г.Алтанбагана, МУГТ, дэслэгч Ө.Дүүрэнбаяр, ахлагч Б.Ганхайч нар өрсөлдөх юм.

Батлан хамгаалахын дэд сайд энэ үеэр “Монгол Улсын нэр хүндийг өргөсөн олон төрлийн уралдаан тэмцээнд Зэвсэгт хүчнээр овоглосон манай тамирчид хэзээд амжилттай оролцож байсан. Энэ удаад ч гэсэн та бүхэн зорьсондоо хүрч амжилтаа бататгана гэдэгт итгэл төгс байна” гэж дасгалжуулагчдаар нь дамжуулан уламжилсны зэрэгцээ тамирчдад зориулсан төрөл бүрийн амин дэм, витамин, уураг зэргийг гардуулан өгсөн юм.