Усны ослын улмаас энэ сарын 10-16-нд нийт 22 хүн нас барсан талаар Цагдаагийн ерөнхий газраас мэдээллээ. 

Тодруулбал,

• Нийслэлд зургаа,
• Орон нутагт 16 хүн нас баржээ.

Хүйсээр нь авч үзвэл эмэгтэй долоо, эрэгтэй 15 байсан ба том хүн 18, дөрөв нь хүүхэд байна.

Гол, нууранд осолдсон байдлыг харвал: 

• Туул голд живсэн дөрөв,
• Хэрлэн голд гурав,
• Хараа голд гурав,
• Эгийн голд нэг буюу голд 11 хүн живсэн байна. Харин нууранд тав, тогтоол усанд таван иргэн амиа алджээ. 

Иргэдийн нас барсан шалтгааны тухайд гэвэл бүгд амралт аялал зугаалгаар явж байжээ. Тодруулбал,

• Сэлэх гэж гол руу орсон,
• Голд хийлдэг гудас хөмөрсөн,
• Нууранд морьтой орсон,
• Загас барьж байгаад хөл алдсан,
• Хаднаас хальтарч унасан зэрэг шалтгаанууд байна.

Одоогоор гурван иргэний цогцос олдоогүй тул эрэн хайх ажиллагаа үргэлжилж байгаа аж. 

Туул голын эрэг дагуу цагдаагийн 101 алба хаагч өдөр бүр явганаар болон мотоцикльтой эргүүл шалгалт хийж иргэдэд сэрэмжлүүлэг хүргэн ажиллаж байна.

Амралт зугаалгын өдрүүд дуусаагүй. Мөн ойрын өдрүүдэд цаг агаар халах төлөвтэй байгаа учир иргэд гол уснаас өөрийгөө болон бусдын амь насыг хамгаалахыг ЦЕГ-аас сэрэмжлүүлж байна.