Дэлхийн зах зээл дээр газрын тосны үнэ 2020 оны тавдугаар сараас хойш тасралтгүй өсөж байна. Үүнтэй холбоотойгоор шатахуун импортлогч компаниуд өнгөрсөн зургадугаар сард автобензины үнийг литр тутамд 600 төгрөгөөр нэмэх санал Уул уурхай, хүнд үйлдвэрийн яамд хүргүүлсэн байдаг. Харин Засгийн газраас нийт хүн амынхаа 60 хувийг “Ковид-19”-ийн эсрэг дархлаажуулалтад хамруулж дуустал шатахууны үнийг нэмэхгүй байхаар аж ахуй нэгжүүдтэй тохиролцсон юм. Гэвч долдугаар сарын 2-ны орой шатахуун түгээх станцууд үнээ нэмсэн. Тухайлбал, АИ-92 автобензин 1450-1750 төгрөг болж, цар тахлын өмнөх үнэ ханшдаа очсон.

   Тэгвэл АИ-92 автобензины үнэ дахин нэмэгдэнэ хэмээн шатахуунаа нөөцөлж байна гэсэн мэдээллийн дагуу  “M-Ойл”, “Магнай Трейд”, “Тэс”, “Петровис”, “Сүпер 92”, “Сод Монгол” зэрэг шатахуун түгээх станцууд борлуулалтдаа хязгаарлалт тогтоосон эсэхийг тодрууллаа. Эдгээр шатахуун түгээх станцаас “Сод Монгол” ХХК борлуулалтын хязгаар тогтоон 30 мянга төгрөгт багтааж шатахуунаа борлуулж байгаа аж. Энэ талаар  тус компанийн шатахуун түгээгч “Хойноос вагон орж ирээгүй учраас шатахууны нөөц багасаж, борлуулалтаа хязгаарласан” гэсэн тайлбар өглөө. Харин “Петровис” шатахуун түгээх станцын түгээгч “Манай шатахууны импорт тасардаггүй учраас борлуулалтдаа хязгаар тогтоодоггүй” гэлээ. Мөн “M-Ойл”, “МТ”, “Тэс”, “Сүпер 92” шатахуун түгээх станцууд борлуулалтын хязгаар тогтоогоогүй байна.

   АИ-92 автобензины үнийн тухайд “Сүпер 92” шатахуун түгээх станц 1710 төгрөгөөр, бусад шатахуун түгээх станцууд 1750 төгрөгөөр худалдаалж байлаа.

Б.БАДАМЗУЛ