24 жилийн насжилттай дулааны 8А, Б, В, Г магистраль шугамыг солих ажил энэ сарын 14-нд эхэлнэ. Шугам сүлжээг өргөтгөх ажил нийт долоон хэсгээс бүрдэх аж. Гүйцэтгэгчээр шалгарсан байгууллагууд энэ сарын 14-нд буюу маргааш ажлаа эхлүүлэх тул Баянгол дүүргийн V, VI, Сонгинохайрхан дүүргийн XII, XVII хорооны хэрэглэгчдийн халуун усыг энэ сарын 14-нөөс есдүгээр сарын 16-ныг хүртэл хязгаарлах юм.                               

Эрчим хүчний яамны захиалгаар, Европын сэргээн босголт хөгжлийн банкны санхүүжилтээр X хорооллоос Сүлжмэлийн үйлдвэр хүртэлх буюу 8А магистраль шугамыг нэвтрэх систем /нэг талдаа 3,3км урттай 500Ф шугам/-д оруулан 600Ф болгон өргөтгөнө. 

Энэ ажлыг халаалтын улирлаас өмнө ашиглалтад оруулахаар ажиллаж байна. 8А магистралийг анх 1997 онд Дани улсын буцалтгүй тусламжаар угсарчээ. 24 жил ажиллаж буй, ашиглалтын хугацаа дууссан шугам юм. Өнгөрөгч өвөл гэхэд 3-4 удаагийн том аваарыг засварлаж шуурхай арга хэмжээ авсан байна.