Энэ сарын 8-ны өдөр Говь-Алтай аймгийн төв Алтай хотод таван  настай хүүхдийг автомашинаараа дайрч, зугтсан хэрэг гарчээ. Хэдийгээр хүүхдийн амь эрсдээгүй ч хөл, гар болон тархиндаа хүнд гэмтэл авсан байна.

          Энэ талаар хүүгийн ээж н.О-гоос тодруулахад “Хүү маань машин дайруулаад дөрөв хонож байна. Баяншандын 2-60 тоотын ойролцоо гудамжинд, энэ сарын 8-ны 12:00-12:30 цагийн хооронд цагаан өнгийн автомашин хүүг минь дайрчихаад зугтсан.Тухайн осол болсон газар камергүй болохоор ямар машин дайрсныг нь мэдэх боломжгүй байна. Хүү минь “Цагаан машин байсан” гэдгээс өөр зүйл хэлж чадахгүй байгаа. Дөнгөж тавхан настай хүүхэд шүү дээ. Аргаа барахдаа цахим сүлжээнд хүүгийнхээ зургийг нийтэлж, хүмүүсээс тусламж хүссэн байгаа. Цагдаа нар эхний хоёр хоног ажиллаж байснаа одоо баяр наадам гээд ч тэр юм уу, ажиллахгүй л байх шиг байна. Хүү маань тархины хагалгаанд орсон. Хүнд хагалгаа болохоор айж л байна” гэв.