Эрүүл мэндийн эмч, ажилтнууд үндсэн цалингаа хоёр дахин нэмэгдүүлэхийг шаардан төв талбайд суулт зарлаж буй. Тэдний төлөөлөл буюу Эрүүл мэндийн ажилтнуудын үйлдвэрчний эвлэлээс өнөөдөр мэдээлэл өглөө. Энэ үеэр төв талбайд суулт зарлаж буй Сэтгэцийн эрүүл мэндийн үндэсний төвийн сэтгэцийн их эмч Ө.Анхболд “Улаан бүсэд ажиллаж байсан эмэгтэй халдварын улмаас нас барж, үр хүүхэд нь өнчирч үлдсэн. Ийм харамсалтай мэдээг өнөө өглөө мэдлээ. Бидний эгнээнд хамгийн идэвхтэй ажиллаж буй Сэлэнгэ аймгийн нэгэн даргын биеийн байдал маш хүнд, сэхээн амьдруулах тасагт хэвтэн эмчлүүлж байгаа” гэв.

Харин Эрүүл мэндийн ажилтнуудын үйлдвэрчний эвлэлийн дарга Х.Ариунаа “Эрүүл мэндийн 56 мянган эмч, ажилтан хоёр жилийн хугацаанд цар тахлын эсрэг тасралтгүй ажиллаж байна. Гэсэн ч халдварын тархалт буурахгүй, өдөрт 10 гаруй хүний амь нас эндэж байна. Энэ бол үндэсний аюулгүй байдалд нөлөөлж буй явдал юм. Мөн эмч, ажилтнуудын хомсдолд орж байгаа нь 3.2 сая хүн амын амь насыг хамгаалахад хүчрэхгүйд хүрч байна. Иргэдийн амь насыг аврахын тулд эмч, ажилтнууд өөрсдөө эрүүл, аюулгүй байх ёстой. Тэд бусад улс орны эмч, ажилтнуудтай харьцуулахад 100 ам.доллар ч хүрэхгүй цалин авч байна. ажилчдын хөдөлмөрийг үнэлэх ёстой. Бид нэг удаагийн тусламж, тэтгэмж хүсээгүй” хэмээн ярилаа.

Салбарын сайд С.Энхболд энэ сарын 6-нд тэдэнтэй уулзаж, цалинг нэмэх тухайд гурван талт уулзалт хийнэ хэмээн мэдээлсэн юм. Улмаар үндсэн цалинг нэмэх гэрээнд гурван тал гарын үсэг зарснаа мэдэгдсэн. Гэвч өчигдөр буюу долдугаар сарын 7-нд Засгийн газраас эмч, ажилтнуудын цалинг хоёр дахин нэмэх боломж улсын төсөвт байхгүй гэж мэдээлсэн юм. Иймд эмч, ажилтнууд суулт зарласан хэвээр байна.