Нийслэл болон төвийн аймгуудад эрчим хүчний доголдол үүсэж, гэнэт цахилгаан тасалдлаа. Мэргэжлийн байгууллагууд гэмтлийн шалтгааныг тодруулахаар ажиллаж байгаа бөгөөд эхний ээлжинд нэгдүгээр зэрэглэл буюу эмнэлгийн байгууллагын тогийг залгаж эхэлсэн гэх мэдээллийг өгөөд буй.

Цахилгааны тасалдлын улмаас амьсгалын аппарат тасалдахад олон хүний амь эрсдэх аюултай. Энэ асуудлаар бид УНТЭ-ийн Ерөнхий захирлын үүргийг түр орлон гүйцэтгэгч Б.Хишигжаргал тодрууллаа.

Тэрбээр "Улаанбаатар хотод ямар ч анхааруулагагүй цахилгаан тасалдсан нь эмнэлгийн байгууллагад эрсдэл үүсдэг. Бид цахилгаан тасалдсантай холбоотой нэлээд сандарлаа. Эмнэлэгүүдэд цахилгаан тасалдах эрсдлээс сэргийлсэн нэмэлт эх үүсвэр байдаг. Гэхдээ ямар ч анхааруулга өгөөгүй үед цахилгаан тасалдах нь нэмэлт эх үүсвэрт холбогдоогүй хэсэгт эрсдэл үүсэх магадлалтай. Харин өнөөдөр цахилгаан хурдан ирлээ. Манай эмнэлэгийн эрчимт эмчилгээний тасаг энгийн үеийнхээс ачаалалтай байгаа. Учир нь, "Ковид-19"-ийн халдвар авсан иргэд амьсгалын аппарат залгуулж байна. Нэмэлт эх үүсвэр гурван цаг орчим л ажиллах боломжтой. Одоогоор цахилгааны тасалдлаас шалтгаалж амьсгалын аппарат ажиллахгүй болсон тохиолдол алга" гэв.