Эмч, эмнэлгийн ажилтнууд цалингаа хоёр дахин нэмэгдүүлэх хүсэлтийг Эрүүл мэндийн яам, Засгийн газарт тавиад буй. Харин 2021 ондоо багтааж тэдний цалинг нэмэх боломжгүй байгаа талаар Ерөнхий сайдын хэвлэлийн төлөөлөгч Ч.Болортуяа мэдээллээ.

         Тэрбээр "Эрүүл мэндийн салбарын, улаан бүсэд ажиллаж байгаа 13 мянган ажилчдын нэг удаагийн урамшуулал хоёр сая төгрөг, улаан бүсэд ажиллаагүй ч нэг сая төгрөгийг урамшуулал олгох төсвийн тодотголыг Засгийн газраас УИХ-д өргөн барьсан, хэлэлцэгдэж байна. Улаан бүсэд ажиллаж байгаа эмч нарын хувьд эрүүл мэндийн даатгалын сангийн шинэчилсэн өөрчлөлтөөр 50 хүртэлх хувиар цалингаа нэмэгдүүлэх боломжтой. Харин яг өнөөдөр эмч нарын цалинг хоёр дахин нэмэх боломж 2021 онд байхгүй. Энэ шаардлагын дагуу 1,1 их наяд төгрөг хэрэгтэй. Тиймээс Эрүүл мэндийн сайд, холбогдох байгууллагууд эмч нартай уулзаж тодорхой хэмжээнд хамтран ажиллах боломжийн талаар ярилцсан талаар мэдээлсэн. Засгийн газар эмч нарын цалинг нэмэгдүүлэх чиглэлд ажиллах болно. Өчигдрөөс эхлэн эмч нар, ажилтнуудынхаа цалинг эрүүл мэндийн даатгалын сангаар дамжуулан тодорхой хэмжээнд нэмэх боломжтой талаараа зарим эмнэлгийг удирдлагууд мэдэгдсэн байсан" гэлээ.