Коронавирусийн халдварын үеийн эмнэлгийн тусламж үйлчилгээнд хээрийн эмнэлгийг ашиглах бэлтгэлийг өнгөрсөн 2020 оны дөрөвдүгээр сард хангасан байдаг.  Тухайн үед Эрүүл мэндийн дэд сайд асан Л.Бямбасүрэн, Эмнэлгийн тусламжийн газрын дарга Я.Буянжаргал нар УОК-ийн Шуурхай штабын төлөвлөлтийн багийнхантай хамтран коронавируст халдварын үед хээрийн эмнэлэг дэлгэн ажиллуулах бэлтгэлтэй танилцаж байлаа.

Хээрийн эмнэлэг нь аливаа өвчин эмгэгийн үед 30-50 хүнд эмнэлгийн тусламж үйлчилгээг үзүүлэх боломжтой, мэс засал, эрчимт эмчилгээ, дүрс оношилгооны хэсгүүдээс бүрдсэн, ханын хүчилтөрөгчийн хангамж, ариутгал халдваргүйтгэлийн хэсэг, агааржуулалтын систем, цэвэр бохир усны хангамжийг бүрэн шийдвэрлэсэн эмнэлэг юм.

Тэгвэл энэ эмнэлэг одоо хүртэл ашиглагдаагүй хэвээр байна. Энэ талаар УИХ-ын гишүүн Д.Сарангэрэл цахим хуудастаа ийн бичжээ.

Тэрбээр “Хээрийн дэлгэдэг эмнэлэг хаана байгааг хайгаад байгаа юм байна. Уг нь энд, тэндээс хайлтгүй тодорхой шүү дээ. Эрүүл мэндийн яам хүсэлт гаргавал дэлгэж болохоор байгаа. Түүнчлэн АНУ-ын Элчин сайдын яамны цэргийн атташетэй уулзаж энэ талаар нэмэлт дэмжлэг авахаар ч тохирсон зүйл бий. Дотооддоо дийлэхгүй бол гадаад дэмжлэг бидэнд бий” хэмээжээ.