Өчигдөр хоёр том хүн, нэг хүүхэд голын усанд живж, амиа алджээ. Мөн голын усанд живсэн байж болзошгүй нэг иргэнийг Онцгой байдлын алба хаагчид хайж байна.

1. Нийслэлийн Хан-Уул дүүргийн 12 дугаар хорооны Туул голын эрэг дээр 11 хүн зугаалж байснаас нэг хүн нь Туул голын усанд живсэн байж болзошгүй тухай дуудлагыг долдугаар сарын 05-ны өдрийн 20:12 цагт хүлээн авсан.  Нийслэлийн Аврах ангийн алба хаагчид 37 км замыг туулан 20:58 цагт очиход нийслэлийн Хан-Уул дүүргийн 11 дүгээр хорооны харьяат иргэн Н /46 настай, эрэгтэй/ голын усанд живсэн байж болзошгүй байсан тул "Сонгино" амралтаас бетонон гүүр хүртэл хоёр километрт эрэн хайх ажиллагааг зохион байгуулсан боловч үр дүнд хүрээгүй учир 22:30 цагт эрэн хайх ажиллагааг түр зогсоосон. Долдугаар сарын 06-ны өдрийн 05:00 цагт дахин эхлүүлсэн.  

2. Сэлэнгэ аймгийн Зүүнбүрэн сумын Мангирт  багийн Зүр хангай гэдэг газар хоёр хүүхэд Орхон голын эрэг дээр тоглож байгаад нэг хүүхэд нь усанд живсэн тухай дуудлагыг долдугаар сарын 06-ны өдрийн 02:46 цагт хүлээж авсан. Тус аймгийн Онцгой байдлын газрын алба хаагчид Б /11 настай, эрэгтэй/-г 05:00 цагаас эхлэн эрэн хайх ажиллагааг зохион байгуулж 07:06 цагт анх осолдсон газраас  зүүн зүгт найман метрийн зайд хоёр метрийн гүнээс цогцсыг олж, Цагдаагийн байгууллагад шилжүүлэн өгсөн.

3. Өвөрхангай аймгийн Уянга сумын Бөөрөлжүүт багийн Бөөрөлжүүт гэдэг газар долдугаар сарын 04-ний өдрийн 23:50 цагт суудлын автомашин голын усанд суусны улмаас  нэг хүн автомашинаасаа бууж явганаар гол гаталж яваад живсэн тухай мэдээллийг долдугаар сарын 05-ны өдрийн 09:45 цагт хүлээж авсан.  Тус сумын Цагдаагийн хэсэг, Засаг даргын Тамгын газрын ажилтнууд гурван км зам туулан долдугаар сарын 05-ны өдрийн 00:05 цагт очиход Уянга сумын төвөөс Бөөрөлжүүт багийн чиглэлд дөрвөн зорчигчтой явсан иргэн Ө /37 настай, эрэгтэй/-ийн “Приус-20” загварын суудлын автомашин Бөөрөлжүүт голын усанд суусан бөгөөд иргэн П /34 настай, эмэгтэй/ автомашины бүхээгээс бууж, явганаар гол гаталж яваад живж, нас барсан тул цогцсыг гаргаж, Цагдаагийн байгууллагад шилжүүлэн өгсөн болно.

4. Нийслэлийн Хан-Уул дүүргийн 11 дүгээр хорооны  орчим Туул голын усанд нэг хүний цогцос хөвж байгаа тухай дуудлагыг долдугаар сарын 05-ны 15:00 цагт хүлээн авсан. Нийслэлийн Аврах ангийн алба хаагчид 3.5 км зам туулан 15:15 цагт очиход нийслэлийн Баянзүрх дүүргийн  тавдугаар хорооны харьяат иргэн Т /65 настай, эрэгтэй/ Туул голын усанд живж, нас барсан тул цогцсыг гарган Хан-Уул дүүрэг дэхь Цагдаагийн нэгдүгээр хэлтсийн жижүүрийн бүрэлдэхүүнд шилжүүлэн өгсөн.