Баянзүрх дүүрэгт байрлах Энэрэл эмнэлгийн гадаа өнөөдөр коронавирусийн халдвартай иргэн тусламж авч чадалгүй нас барсан. Талийгаач тус дүүргийн харьяат бөгөөд Чингэлтэй дүүрэгт амьдардаг байжээ. Тэрээр түргэвчилсэн оношлуураар шинжилгээ өгтөл эерэг гарсан бөгөөд тухайн үед ахтайгаа хамт явж байжээ. Эмнэлгийн гадна ямар учраас тусламж авч чадалгүй амиа алдсан талаар Энэрэл эмнэлгийн даргаас тодрууллаа.

-Танай эмнэлгийн гадаа коронавирусийн халдвартай иргэн тусламж авч чадалгүй нас барсан байна. Яагаад ийм зүйл болсон юм бэ?

     -Улаан бүсд ажиллаж байгаа эмч нар нэг ч удаа гадагш гарахгүйгээр, дотроо тусгаарлагдаад ажиллаж байгаа. Эмнэлгийн гадна хамгаалтад гарч буй цагдаагийн алба хаагч байсан. Мөн коронавирусийн улмаас эмнэлэгт хэвтэх иргэдийн орны мэдээлэл өглөө нь гардаг. Дүүрэг тус бүрийн хяналтын багаас тухайн өдөр хэдэн ор суларсан талаар асууж, мэдээллийг нь авдаг. Үүний дагуу оронд нь эмнэлэгт хэвтэх хүмүүсийн мэдээллийг манайх руу явуулдаг юм. Энэ хүмүүсийн нэрэн дунд талийгаач эрэгтэйн нэр байгаагүй. Хувиараа манай эмнэлэгт ирсэн юм билээ.

Гадаа байсан цагдаагийн алба хаагч “Чингэлтэй дүүргээс хоёр хүн ирсэн. Баянзүрх дүүргийн харьяатай юм байна” гэж хэлэхэд нь манай эмч нар “Манай эмнэлэгт хэвтэх ёстой хүн биш байна. Баянзүрх дүүргийн харьяат гэж хэлэхэд нь дүүргйин Эрүүл мэндийн төвд хандаарай” гэж хэлсэн юм байна. Тэгээд талийгаач эрэгтэй ахтайгаа хамт дүүргийн Эрүүл мэндийн төвд очтол яагаад ч юм аваагүй гэнэ. Ингээд манай эмнэлэгт буцаж ирсэн. Тэр үед манай эмнэлгийн жолооч ирж таараад тэр хүнийг хараад ахад нь “Энэ хүний чинь биеийн байдал таагүй байгаа юм биш үү” гэж хэлтэл ах нь гар утсаар яриад байсан гэнэ. Тэгэхээр нь манай жолооч түргэн тусламж дуудсан юм байна. Гэтэл 103-ийнхныг ирэхэд нас барчихсан байсан.

Манай эмнэлгийн эмч үзлэг хийчихээд, хэвтүүлэхгүй гэсэн зүйл байхгүй. Учир нь улаан бүсд ажиллаж байгаа эмч нар гадаа гарах боломжгүй. Тэд эмнэлэг дотор ажлаа хийж байсан. Чингэлтэй дүүргийн хүн ирлээ гэж мэдэгдэхэд нь манайд хэвтэх хүмүүсийн нэрсийн жагсаалтад байгаагүй учир хүлээж авах боломжгүй байсан.

-Нэрсийн жагсаалтад байхгүй гээд тэр хүнийг аваагүй гэсэн үг үү. Яагаад анхны тусламж үзүүлээгүй юм бэ?

       -Ковидын эмнэлэг ямархуу зарчмаар ажиллаж байгааг ойлгох хэрэгтэй. Эмнэлгийн гадаа зөвхөн цагдаагийн алба хаагч байсан. Тэр хүний биеийн байдлыг цагдаагийн алба хаагч оношлох боломжгүй. Дотор улаан бүсд ажиллаж байсан эмч нар гарч очоод тэр хүний биеийн байдлыг үзэх боломжгүй. Андуурал үүсээд эсвэл өөрсдөө хувиараа хэвтэх гээд ирж байгаа иймэрхүү хүмүүс өдөр болгон ирж байгаа.

-Эмч нар гадаа гарч болоогүй юм бол эмнэлэг рүүгээ оруулаад үзэж болохгүй байсан юм уу?

      -Оруулах боломжгүй. Тэр хүнийг халдвартай эсэхийг нь мэдэхгүй байж улаан бүс рүү шууд оруулахгүй.