Цахим наадмыг хойшлуулахтай холбоотойгоор “Босоо хөх Монгол” ТББ-ын удирдах зөвлөлийн гишүүн П.Шинжээравдангаас байр суурь авлаа. 

      Тэрбээр “Ардын хувьсгалын 100 жилийн ой тохиож буй гээд олон хүнийг эрсдэлд оруулах шаардлагагүй. Тэгэхээр наадмаа хойшлуулах л ёстой. Хөл бөмбөгийн Европын аварга сая хойшиллоо. Тэр бүү хэл хүн төрөлхтний цэнгэлийн манлай Олимп хүртэл хойшилсон шүү дээ. Иймд манай улс Үндэсний их баяр наадмаа нэг жилээр хойшлуулахад буруудахгүй болов уу. Хамгийн чухал нь монгол хүн эрүүл, аюулгүй амьдрах юм. Морь уралдахгүй байлаа гээд үхчихгүй. Наадмын бэлтгэл, уяа сойлго гэж удаан хугацаанд бэлдэж, их ажил болсон юм бол гал, галдаа жижигхэн уралдаан зохион байгуул. Харин сүр дуулиантай наадмаас илүү хүүхдийн амь чухал. Наадам зохион байгуулбал коронавирус маш хурдацтай тархана.

 Монголын төр энэ эрсэдлийг тооцоолоод, сайн бэлдсэн бол даван туулах боломжтой байсан. Үнэн хэрэгтээ сонгууль хийгээгүй бол “Наадмаа хий” гэж иргэд шаардахгүй байсан.

 "Эхлээд сонгуулиа хийе, дараа нь цахимаар наадая" гэж ард иргэдийг уриалсан болохоор бөхчүүд, уяачид, харваачид бэлтгэлдээ гарахгүй гээд яах вэ дээ. Монголчууд урьтаж мэдээд, тосч бэлдээд, давж гардаг ард түмэн. Тусламжаар орж ирсэн хоёр их наяд төгрөгөөр эмнэлэг барьсангүй, сайн чанарын вакцин авсангүй, ер нь дорвитой ажил хийж чадсангүй. Өнөөдрийн энэ цаг үеийг яалт ч үгүй засаг барьж, төрд сууж байгаа намынхан бидэнд авчирсан. Тийм байж одоо юун наадам хийх гээд байгаа юм бэ” гэв.