Монголын Криминологичдын холбооноос академич С.Нарангэрэл, гавьяат хуульч, доктор, профессор Н.Жанцан, хууль зүйн ухааны доктор, профессор Д.Зүмбэрэллхам нарыг “Хүндэт ерөнхийлөгчийн од” шагналаар шагналаа. Шагнал гардуулах арга хэмжээнд академич С.Нарангэрэл хүндэтгэх шалтгааны улмаас шагналаа гардан авч чадаагүй юм. 

            Шагнал гардуулах ёслолын үеэр гавьяат хуульч, доктор, профессор Н.Жанцан баярын сэтгэгдлээ илэрхийлсэн юм. Тэрбээр “Монголын Криминологичдын холбооноос хүндэт ерөнхийлөгч нараа тодорхойлж, шагнаж байгаад таатай байна. Манай улсад гэмт хэрэгтэй тэмцэх шинжлэх ухааны үндэслэлтэй шалтгаан нөхцөлийн арга зүйг заахад ОХУ-ын эрдэмтэд нэн үнэтэй туслалцаа үзүүлж байсан. Түүнээс хойш Криминологичдын холбооноос монголын хуульчид өсөж, өндийсөн. Тус холбоо өдгөө монголын гэмт хэргийн шалтгаан нөхцөлтэй холбоотой томоохон судалгааны ажил хийж байна. Энэ нь Монгол Улсад хууль ёс, ялангуяа гэмт хэрэгтэй тэмцэх ажлыг шинжлэх ухааны үндэслэлтэй  явуулахад туслах нэр хүндтэй байгууллага болсон. Энэ байгууллагын удирдлагуудад дахин талархаж байна” гэлээ.

      Харин Хууль зүйн ухааны доктор, профессор Д.Зүмбэрэллхам “Монголын эрх зүйн салбарын ноён оргил болсон эрхмүүдтэй цуг шагнал авч байгаадаа баяртай байна. 10 гаруй жил мөрдөн байцаагчаар олон байгууллагад ажилласан. Миний магистр, докторуудад зориулж хийсэн судалж, үзэх ном бэлэн болж байгаа. Түүгээрээ өнөөдрийн гардан авч буй шагналынхаа хариуг баръя” гэв.

     Тус шагналыг энэ жил анх удаа гардуулж байгаа билээ. Тиймээс цаашид жил бүр уламжлал болгон гардуулах юм. Тус холбоо нь 1999 онд байгуулагдаж 22 дахь жилдээ амжилттай ажиллаж байна. Монголын Криминологичдын холбоо нь нийгмийн сөрөг үзэгдэл болох гэмт явдлын шалтгааныг судалж, урьдчилан сэргийлэх ажлыг зохион байгуулах, онол арга зүйн үндсийг боловсруулах, криминологийн шинжлэх ухааныг хөгжүүлэх, олон нийтэд сурталчлах чиглэлээр үйл ажиллагаа явуулдаг нийгэмд үйлчилдэг ашгийн төлөө бус төрийн бус байгууллага юм. Холбооны ерөнхийлөгчөөр Г.Эрдэнэбат, Гүйцэтгэх захирал М.Сүхбаатар, Удирдах зөвлөлийн даргаар Хууль зүйн ухааны доктор Б.Батзориг нар ажилладаг билээ.