Засгийн газар Өршөөлийн хуулийн төслийг боловсруулж, УИХ-д өргөн барьсан. УИХ-ын Хууль зүйн байнгын хорооны өнөөдрийн хуралдаанаар тус хуулийн төслийг хэлэлцэх эсэхийг шийдэх юм. Тэгвэл тус хуулийн төсөлд Үндэсний их баяр наадмаар допин хэрэглэсэн бөхчүүд, харваачдыг өршөөх заалт оруулсан талаар мэдээлсэн билээ. Тодруулбал, хуулийн төслийн наймдугаар зүйл.

Зөрчлийн болон бусад шийтгэлээс чөлөөлөх

8.3. "2021 оны долдугаар сарын 1-ний өдрөөс өмнө үндэсний их баяр наадмын тухай хууль тогтоомжид заасны дагуу үндэсний бөхийн барилдаан болон сур харваанд оролцох эрхээ хасуулсан бөх, сурын харваачийн үндэсний их баяр наадамд оролцох эрхийг нэг удаа өршөөн сэргээнэ" хэмээн заажээ. Манай улс зургаан удаа Өршөөлийн хууль баталж байсан ч допинг хэрэглэсэн бөхчүүдийг өршөөх заалт оруулж байгаагүй билээ. Уг хуулийг 2021 оны долдугаар сарын 1-ний өдрөөс эхлэн дагаж мөрдөх аж.

Тэгвэл уг хууль хэрэгжсэнээр дараах бөхчүүд өршөөгдөж магадгүй. Тодруулбал, Улсын аварга Э.Оюунболдын гомдлын дагуу АТГ-аас 2009-2019 онд улсын наадамд шөвгөрсөн бөхчүүдийн допингийн шинжилгээг нягтлахад 38 бөх уг хэрэгт холбогдсон. Монголын үндэсний бөхийн холбооноос эдгээр 38 бөхийн нэрийг зургадугаар сарын 10-ны дотор зарлахыг шаардаж байсан юм. Тэгэхээр эдгээр бөх дээрх хуулиар өршөөгдөнө гэсэн үг. Мөн барилдах эрхээ хоёр жилээр хасуулсан улсын начин Д.Цэрэнтогтох, 11 сараар хасуулсан улсын аварга Н.Батсуурь, улсын арслан Р.Пүрэвдагва, улсын харцага болсон Б.Бат-Орших нарт энэ хууль үйлчилж болзошгүй байна.