Хөшигийн хөндий дэх Чингис хаан олон улсын нисэх буудлын нээлтийн нислэг долдугаар сарын 4-нд болно.

Тодруулбал, Засгийн газрын 2020 оны 134 дүгээр тогтоолын дагуу “Буянт-Ухаа” олон улсын нисэх буудлын үйл ажиллагааг Хөшигийн хөндий дэх “Чингис хаан” олон улсын шинэ нисэх буудал руу шилжүүлж байгаа билээ. Нээлтийн нислэгийг ирэх долдугаар сарын 4-ний 11:40 цагт Улаанбаатарт-Токио чиглэлд үйлдэх бөгөөд тус онгоц оройн 23:00 цагт газардах юм. Уг нислэгийг МИАТ ТӨХК-ийн онгоцоор үйлдэнэ.

Иргэд шинэ нисэх буудал руу нийтийн тээврийн дараах дөрвөн чиглэлээр үйлчлүүлэх боломжтой. 

Үүнд:

1. “Буянт-Ухаа” Олон улсын нисэх буудал-“Чингис хаан” Олон улсын шинэ нисэх буудал
2. Төмөр замын төв вокзал-“Чингис хаан” Олон улсын шинэ нисэх буудал
3. Дүнжингарав худалдааны төв-“Чингис хаан” Олон улсын шинэ нисэх буудал
4. Драгон төв-“Чингис хаан” Олон улсын шинэ нисэх буудал руу тус тус үйлчилнэ гэж ИНЕГ-аас мэдээллээ.