УИХ-ын гишүүн Н.Ганибал баяр наадмын хурдан морьдыг ялгах ажилд гар бие оролцохоо мэдэгджээ.

           Тэрбээр Байгаль орчин, хүнс, хөдөө аж ахуйн байнгын хорооны дарга Х.Болорчулуунд албан хүсэлт хүргүүлсэн байна. Хүсэлтэд “Үндэсний их баяр наадмыг зохион байгуулах хорооны 2015 оны тавдугаар тогтоолоор “Монгол морьдоос эрлийз морьдыг тусад нь уралдуулах журам”-ыг баталсан боловч тус журмын хэрэгжилт жилийн жилд хангалтгүй байсаар ирсэн билээ. Иймд УИХ-ын тухай хуулийн 23 дугаар зүйлийн 2.11-д заасны дагуу УИХ-ын Байгаль орчин, хүнс, хөдөө аж ахуйн байнгын хорооны дэргэд “Хурдан морины үүлдэр угсааг тогтоох, шүдлэх ажиллагаанд хяналт тавих ажлын хэсэг” байгуулан, тус ажлын хэсгийн ахлагчаар миний бие ажиллах саналтай байгаагаа үүгээр илэрхийлж байна. Ажлын хэсгийн бүрэлдэхүүнд УИХ-ын гишүүн Ширнэнбаньдын Адьшаа, Цэвэгдоржийн Туваан нарыг оруулах саналтай байгааг харгалзан үзэж, холбогдох хуулийн хүрээнд шийдвэрлэж өгөхийг хүсье” гэжээ.

УИХ-ын гишүүн Н.Ганибалаас уг ажлын хэсэгт орох нь тийм чухал эсэхийг тодрууллаа.

            Тэрбээр “Засгийн газраас монгол төрийн наадмыг зохион байгуулах болсон талаар албан ёсоор зарлалаа. Орон нутагт наадам хийхгүй учраас уяачид улсын наадамд морио уралдуулахаар зорьж ирнэ. Хурдан морины уралдаан зохион байгуулах комисс, үүлдэр тогтоох ажлын хэсгийн үйл ажиллагааг хянахын тулд ийм шийдвэр гаргалаа. Гаргасан дүрэм, журмын дагуу ажлаа хийж байгаа эсэхийг хянана. Яагаад ийм шийдвэр гаргасан бэ гэхээр сүүлийн жилүүдэд Үндэсний их баяр наадамд эрлийз адуу уралдуулахын тулд зохион байгуулах комиссын гишүүдэд авлига өгөх тохиолдол эрс ихэссэн. Сүхбаатар аймгийн уяачид "Энэ хууль бус зүйлд хяналт тавиад өгөөч. Орон нутгаас зориод очихоор морийг маань уралдуулахгүй байх вий. Улаанбаатарыг тойрсон эрлийз адуу уралдах вий" гэх хүсэлт надад тавьсан. Үүний дагуу бид гаргаж байгаа шийдвэр нь хэр оновчтой, урьдчилсан сэргийлэх ажлыг зөв хийж байгаа эсэхэд хяналт тавих юм. Өнгөрсөн жилийн наадам шиг эрлийз адууг монгол адуутай хамт уралдуулж, наадмыг будлиантуулж болохгүй. Монгол адуугаа уралдуулж, уламжлалт ахуй соёлоо түгээн дэлгэрүүлэх ёстой. Гэтэл хэн нэгэн баян, хөрөнгөтэй хүмүүс гадаадаас үнэтэй адуу авчирч, наадамд уралдуулж, төрийн манлайд хүрэх нь өрөөсгөл ойлголт юм. Орон нутгийн уяачид Ардын хувьсгалын 100 жилийн ойгоор хурдан хүлгийнхээ тоосыг өргөж, төрөө хүндэлж ирнэ шүү дээ. Тэдний хөдөлмөрийг үнэгүйдүүлж болохгүй. Ажлын хэсгийн бүрэлдэхүүнд УИХ-ын гишүүн Ширнэнбаньдын Адьшаа, Цэвэгдоржийн Туваан нарыг оруулах саналыг Х.Болорчулуун даргад аман хэлбэрээр болон албан бичгээр хүргүүлсэн. Одоогийн байдлаар хариу өгөөгүй байна. Дээрх хоёр гишүүн уяач хүний зовлон, жаргалыг мэдэх учраас ажлын хэсэгт оруулах хүсэлт тавьсан хэрэг” гэлээ.