Монголын Зохиолчдын эвлэлээс уламжлал болгон зохион байгуулдаг “Болор цом” яруу найргийн наадам 38 дахь жилдээ болж өнгөрлөө. “Эгшиглэнт эх”-ийн хишигт олон сайхан олон сайхан яруу найрагчийг төрүүлдэг тус наадам энэ жил үзэгчгүй болсноороо онцлогтой болов. Мөн Цагдаагийн байгууллагын түүхт 100 жилийн ойтой хамтран зохион байгуулсан гэдгээрээ ч өмнө жилүүдээс ялгарч байлаа. Энэ удаагийн утга уянгын их наадмын тэргүүн яруу найрагчаар Завхан аймгийн Эрдэнэхайрхан сумын уугуул О.Цэнд-Аюуш шалгарч, “Эгшиглэнт эх”-ийн хишигт найрагчаар тодорсон юм.

Тэгвэл түүнийг “Болор цом” хүртсэний маргааш нь нутгийн зөвлөл нь хүлээж авч уулзлаа. Энэ үеэр Тод манлай уяач, "Сонор трэйд" ХХК-ний гүйцэтгэх захирал Б.Энхболд “Нутгийн дүү маань олон жил хүлээж байж “Болор цом”-ын эзэн боллоо. О.Цэнд-Аюуш маань наадмынхаа тайзнаас дөнгөж буухдаа л над руу залгаж “Ах аа би Эрдэнэхайрхандаа Янжинлхам бурхан заллаа шүү” гэж хэлсэн. Дүүтэйгээ ойрхон явдаг хүний хувьд би маш их баяртай байна. Гэхдээ эрдэнэхайрханчууд надаас илүү баярлаж байгаа байх аа. Миний хувьд олон жил нутгийнхаа нэрийг өндөрт өргөж, сайн яваа олон хүний хань түшиг болж, тэдэндээ тус болохыг хичээж явдаг хүн. Хамгийн түрүүнд надад энэ сайхан мэдээг дуулгасан дүүдээ баярлаж өнөөдөр ирэхийг урьсан юм. Сүүлийн жилүүдэд ажиглаад байхад аймаг орон нутгаас нь “Болор цом”-ын эзэн төрвөл орон сууц бэлэглэдэг болсон байна. Энэ нь нутгийнхаа найрагчийн оюун ухааныг урамшуулж, уран бүтээлийн ташуур өгч буй зөв үйлдэл юм. Олон жил уран бүтээлдээ тоосгүй манлайлж, нутаг усныхаа нэрийг өргөж яваарай гээд дүүдээ хувийнхаа зүгээс 20 сая төгрөг өгч байна. Гэхдээ энэ эхлэл юм шүү миний дүү. Миний араас олон сайхан хүн энэ нэр хүндтэй шагналыг нь мялааж, багадаа гурван өрөө байртай болох байх гэдэгт итгэж байна. эрдэнэхайрханчуудын хийморь ивээж яваг” гэлээ.   

 Мөн нутгийн бизнесс эрхэлдэг залуусын төлөөлөл “О.Цэнд-Аюушдаа баяр хүргэе. Бидний үеийг өнгөлж явдаг найз маань магнай тэнийлгэсэн сайхан мэдээ дуулгасан таатай байна. Нутгийн зөвлөлийн дарга эзгүй байгаа ч гэсэн сая утсаар холбогдож баяр хүргэснийг нь уламжилж байна. Мөн Завхан аймгийн Эрдэнэхайрхан сумын  Нутгийн зөвлөлөөс “Болор цом”-ыг нь мялааж 40 сая төгрөг өгч байгааг дуулгахад таатай байна” гэлээ.