Ардын хувьсгалын 100 жилийн ойн баяр наадмыг цахим хэлбэрээр зохион байгуулах тул найруулагч Б.Баатар голлон ажиллахаар болсон. Жилээс жилд хүн хүч, олны хэсгээр үзэгчдийг огшоодог байсан наадамд өнөө жил хамгийн ихдээ 350 хүн оролцуулахаар төлөвлөсөн байна. Тодруулбал  Урлаг соёлын 250 орчим хүн, 100 орчим цэрэг оролцох аж.

Харин наадмын нээлтэд 850 сая төгрөг төсөвлөсөн байна. Сүүлийн гурван жил наадмын нээлтэд 600 сая төгрөг төсөвлөдөг байсан ч энэ жил ийнхүү нэмэгдсэн нь цар тахалтай шууд холбоотой гэнэ. Тухайлбал, оролцогчдын халдвар хамгааллын дэглэм баримтлах, хамгаалах хувцас хэрэгсэл, оношлуур болон тэдний дархлааг дэмжих бүтээгдэхүүн зэргийг багтаасан учир төсөв ийнхүү нэмэгджээ.

Мөн тус хурлын үеэр Соёлын дэд сайд М.Батбаяр “Ерөнхий сайд энэ сарын 16-ны өдөр Ардын хувьсгалын 100 жилийн ойг тэмдэглэх үйл ажиллагаанаас хэмнэсэн зардлыг эрүүл мэндийн салбарт шилжүүлнэ гэдэг шийдвэр гаргасан. Энэ шийдвэр хуулийн дагуу УИХ хэлэлцэж, төсвийн тодотголоор шийдэгдэнэ. Үндэсний их баяр наадам, Ардын хувьсгалын 100 жилийн ой хоёрыг салгаж ойлгоочээ гэж хүсмээр байна.  “Баяр наадмыг 10 тэрбумаар тэмдэглэнэ” гэдэг холбоо үгээ өнөөдрөөс больцгооё. Үнэхээр ард түмэн сэтгэл санаа тогтворгүй, хүнд байдалтай байгаа үед бухимдуулмааргүй байна” гэлээ.