Улсын хил шалгах, тогтоох, зурагжуулах ажилд Геодези, зураг зүйн газрын үүрэг оролцооны талаар ГЗБГЗЗГ-ын Геодези, зураг зүйн хэлтсийн дарга Д.Мөнхцэцэг тодруулахад “Геодези гэдэг бол газар дээр болон доор байгаа объектуудыг солилцуулж, газрын зураг дээр зурах үйл ажиллагаа явуулдаг байгууллага. Зураг зүйн салбар нь болохоор түүнийг зураг болгож, ханын болон ширээний “Атлас” зураг хийж иргэдэд мэдээлэх үүрэгтэй. Зураг зүйн салбарын зургуудыг ашиглахгүй байгууллага, салбар гэж байхгүй. Батлан хамгаалах улс орны аюулгүй байдлыг хангахын тулд ашиглана. Хот байгуулалт хотыг хаана байгуулбал аюулгүй байна гэдгийг газрын зураг ашиглаж, төлөвлөдөг.

Барилга байгууламж, авто зам, төмөр зам, инженерийн байгууламжуудыг байр зүйн зураг дээрээ төлөвлөөд, дараа нь барилга байгууламж барих үедээ төлөвлөсөн зургийн дагуу хэмжилтүүдийг хийж өгдөг. Хамгийн сүүлд нь авто зам, төмөр замын хучилтаа хийхийн өмнө хяналтын хэмжилт хийж, бүтээн байгуулалт дууссаны дараа газрын зураг дээр  гүйцэтгэлийн зураг гэж хийгээд Улсын комисст хүлээлгэж өгдөг. Энэ үйл ажиллагаанд Геодези, зураг зүйн салбарынхан оролцдог.

Нэг онцлох зүйл бол улсын хил тогтоох, шалгах, зурагжуулах ажилд манай салбарынхан оролцдог. Хоёр улсын гэрээ байдаг. Тус гэрээнд 15-20 жил тутамд улсын хилээ шалгах, зурагжуулах ажлыг хийж гүйцэтгэнэ гэж тусгасан. Бид анхны хилээ шалгаж, зурагжуулах ажлыг 1987-2001 он хүртэл хийж байсан. Түүнээс хойш 20 жил өнгөрсөн учраас энэ жил улсын хилээ шалгах, зурагжуулах ажлыг хийж гүйцэтгэнэ” гэлээ.