Ховд аймаг дахь Зэвсэгт хүчний 123 дугаар ангийн хөгжимчин, ахлах ахлагч Э.Даваажамц Ховд аймгаас Улаанбаатар хот хүртэл 1500 км зайд гүйхээр замдаа гарсан.  Тэрбээр одоогоор 900 км зам туулаад байна. Хоёр хоногийн гүйлтийн дараа Өвөрхангай аймагт хүрэхээр тооцоолсон байна. Э.Даваажамц өөрийн цахим хуудсаараа “Би долдугаар сарын 10-нд Төрийн далбааны өдөр Төв талбайдаа орохоор төлөвлөж байсан. Гэсэн хэдий ч коронавирусээс үүдэн Төрийн далбааны өдрийн баярын парадыг цуцалсан. Тиймээс миний гүйлтийн маршрутад өөрчлөлт орж байна. Би Ховд аймгаас 2100 км Дорнод аймгийн Чойбалсан хотод бариагаа хийхээр болсон. Үүнийг би ганц шийдээгүй. Жанжин штаб, Хуурай цэргийн командлагч, Зэвсэгт хүчний 123 ангийн удирдлагуудтай зөвлөлдөж шийдсэн” гэлээ.