Унтаж байхдаа хэл сурж болох эсэх талаар 1930-аад оны үеэс эрдэмтэд эрчимтэй судалж эхэлжээ. Унтах үед хүн тухайн өдөр хүлээн авсан мэдээллээ кодолж, урт хугацааны ой санамж болгон хадгалдаг аж. Энэ үед ухамсаргүйгээр шинэ мэдээлэл суулгах боломжтой эсэх дээр судлаачид өнөөг хүртэл санал нэгдээгүй байгаа ч 2019 онд нэгэн сэтгүүлийн өгүүлэлд “Хүн унтаж байхдаа үгсийн утгын хамаарлыг кодлох боломжтой” гэж дүгнэсэн байна. Харин үүнийг турших боломжийг МҮОНРТ-ийн “Монголын дуу хоолой” радиогийн хамт олон сонсогчдодоо олгожээ. 1964 оноос хойш олон улсад Монгол Улсынхаа дуу хоолойг хүргэж байгаа тус радио нь өдгөө англи, орос, япон, хятад, монгол хэлээр бэлтгэсэн нэвтрүүлгээ олон улсад цацаж байгаа билээ.

“Монголын дуу хоолой” радиогийн ерөнхий редактор З.Дэнсмаа “Гадаад хэлний мэдлэг маш чухал болсон өнөө үед бид олон улсад чиглэсэн уламжлалт нэвтрүүлгүүдээсээ гадна Монголчуудынхаа хэлний боловсролд хувь нэмэр оруулах зорилготой ажиллаж байна” гэж “Монголын Дуу Хоолой” хэмээн ярьсан юм. Түүнчлэн “Бид техник технологийн дэвшилтэй хөл нийлүүлж, дэлхий даяарх сонсогчдодоо улам ойртож ажиллах шинэ боломжуудыг эрэлхийлж ажиллаж байна. Үүний хүрээнд гадаадын сонсогчдодоо Монгол улсын онцлогийг танилцуулсан Монгол хэлний хичээл зэрэг сонирхолтой ажлууд төлөвлөсөн” гэсэн юм.

“Монголын дуу хоолой” радио 16 хүний бүрэлдэхүүнтэйгээр ажилладаг. Тус хамт олон эфирийн дөрвөн хэлээрээ “Амрах зуураа хэл сурцгаая” гэх контент бэлдсэн бөгөөд цаашид Герман, Франц зэрэг хэлээр баяжуулах төлөвлөгөөтэй байгаа аж. Та энэхүү контентийг доорх холбоосоор болон youtube сувгаар хүлээн авч сонсох боломжтой.

https://youtu.be/7Hg2aTR3DDI

https://youtu.be/uQZvJLmVrow

https://youtu.be/jnmbh6O8R8U

https://youtu.be/EljM-OBIiLI

 “Монголын дуу хоолой” радио дэлхийн олон оронд өөрийн гэсэн тогтмол сонсогчтой. Тус радио дэлхийн 40-өөд орны сонсогчдоосоо жилдээ 3000 гаруй захидал хүлээн авдаг байна. МҮОНРТ үйл ажиллагаагаа шинэ платформуудад амжилттай нэвтрүүлж, “MNB New Media Project” төсөл хэрэгжүүлж байна.