Хэнтий аймгийн Бор-Өндөр сумын цагдаагийн хэлтсийн алба хаагч Б нь мотоциклийн жолооч Д-г зодож, 200 мянган төгрөг нэхсэн гэх мэдээлэл цахим орчинд цацагдаад байна. 

---

Энэ хэргийн талаар мотоциклийн жолооч Д-ийн дүү Т.Эрдэнэчимэгээс тодруулахад “Тэр цагдаад зодуулсан хүн манай авга ах байгаа юм. Хөдөө айл айлын мал хариулж амьдардаг. Мотоциклийн дугуйгаа янзлуулахаар сумын төв орж ирээд, хөл хорионд ороод, буцаж чадахгүй байгаа. Тэгээд тэр өдөр би ахыгаа “Хөдөө ноосны шуудай хүргээд өг” гээд мотоциклтой нь явуулсан юм. Гэтэл яваад цаг гаруй болсон ч ирээгүй. Гайхаад байж байтал манай эгч рүү постын цаана байсан хүн холбогдоод “Танай ахыг энд цагдаа зодоод байна шүү. Та нар ирж аваачээ” гэж хэлсэн байна лээ. Манай эгч саяхан төрсөн, нялх биетэй учир би пост руу очсон. Тэгээд очтол ахыг минь дээш нь харуулаад гавласан байдалтай байсан. Манай ах 52 настай хөгшин хүн. Чадалтай, боломжтой бол ингэж дээрэлхэхгүй л байсан байх. Миний муу ядарсан ах харваад уначихвал яах юм. 

Би ахыгаа цагдаагийн алба хаагчийн шаардлагыг эсэргүүцэж, мотоциклтой зугтаасан юм байх гэж бодож пост нь дээр очсон. Гэтэл тэнд байсан хүмүүс “Танай ах ямар ч эсэргүүцэл үзүүлээгүй. Энэ цагдаа л учир зүггүй дайрч, биед нь халдсан” гэж байсан. Хууль дүрэмдээ жолооны үнэмлэхгүй явж байгаа иргэнийг 200 мянган төгрөгөөр торгодог юм билээ. Гэхдээ одоо цаг үед бэлэн 200 мянган төгрөгтэй хүн ховор шүү дээ.

 

Манай ах “Ах нь хөдөөнөөс орж ирээд хөл хорионд орсон. Жолооны үнэмлэх манай дүүгийнд байгаа. Ах нь энд мотоциклоо үлдээгээд, дүүгийнхээ гэрээс очоод 200 мянган төгрөг аваад ирье” гэж хэлсэн байгаа юм. Тэгсэн тэр цагдаа “Тийм юм гэж байдаггүй юм. Одоо халаасыг чинь ухна. Чам шиг муу юмыг буудах эрх нь ч надад байгаа шүү” гэж хэлээд, өшиглөж, зодсон гэсэн.

 

Тэнд байсан хүмүүс эхнээс нь дуустал бичлэг хийсэн байна лээ. Надад зурвасаар бичлэг, зураг илгээж буй иргэн олон байна. Би цагдаагийн байгууллагын нэр төрд халдсан болох вий гээд бичлэг тавиагүй. Хэрэг үнэн, зөвөөр шийдэгдэхгүй бол надад байгаа бичлэгийг тавихад бэлэн байна. Тэр цагдаа манай суманд сүүлийн жил гаруй хугацаанд ажиллаж байгаа гэсэн. Насаар залуухан хүү байна лээ. Харамсалтай нь харилцаа, хандлага их муутай. Над руу хүртэл дайрч, гарыг минь хөхрүүлж, хурууг минь гэмтээсэн” гэлээ.

 

Харин ЦЕГ-ын Хэвлэл мэдээллийн төвийн ахлах мэргэжилтэн, цагдаагийн хошууч О.Эрдэнэхишиг энэ талаар тайлбар өгөв. Тэрбээр “Олон нийтийн сүлжээний “Бор-Өндөр - Хот хоорондын такси” Фэйсбүүк цахим грүппт цагдаагийн алба хаагч иргэнтэй зүй бусаар харьцсан гэх мэдээлэл нийтлэгдсэн байсан. Уг мэдээллийг шалгаж тодруулахад Хэнтий   аймаг  дахь   цагдаагийн   газрын   Бор-Өндөр   сум   дахь   сум   дундын   цагдаагийн хэлтсийн   Нийтийн   хэв   журам   хамгаалах   хэсгийн   харуулын   цагдаа,   цагдаагийн   дэд   ахлагч С нь Онцгой байдлын хэлтсийн алба хаагч, дэд ахлагч Б-ийн хамт 2021 оны зургадугаар сарын 20-ны өдрийн 11:28 цагийн орчим тус сумын  дөрөвдүгээр  багт байрлах  хорио  цээрийн  дэглэм сахиулах шалган нэвтрүүлэх цэгт /пост/ үүрэг гүйцэтгэж байх хугацаанд эрэгтэй, 52 настай Д гэгч нь улсын дугааргүй Да-Юун маркийн мотоцикл жолоодож тухайн пост дээр ирэх  үед нь зогсоож шалгасан байна. Уг иргэн тээврийн хэрэгсэл жолоодох “А” ангиллын эрхийн үнэмлэхгүй байсан тул Монгол Улсын Зөрчлийн   тухай хуулийн 14 дүгээр зүйлийн 14.7.1 дэх хэсгийг тайлбарлан өгч, цагдаагийн   хэлтэс рүү авч явах, мөн тээврийн хэрэгслийн түлхүүрийг өгөх талаар хууль ёсны шаардлага тавихад иргэн Д эсэргүүцсэн тул цагдаагийн албаны тухай хуулийн 49 дүгээр зүйлийн 49.1.1 дэх хэсэгт заасны дагуу биеийн хүч, тусгай хэрэгсэл хэрэглэсэн байна. Тухайн иргэнд хууль тайлбарлан өгч 200.000   төгрөгөөр   торгох   үндэслэлтэй талаар тайлбарлаж өгсөн ба мэдээлэлд дурдсан шиг хавсарч унаган өшиглөж, бэлнээр мөнгө авчирч өг гэж хэлээгүй болох нь шалгалтын явцад урьдчилсан байдлаар тогтоогдож байна. Олон нийтийн сүлжээнд пост оруулсан  иргэн “Э” гэгч   нь   цагдаагийн   алба хаагч “С”-ын   биед   халдаж,  тавьсан шаардлагыг нь эсэргүүцсэн үйлдлийг /Камерын бичлэгтэй/ тус аймгийн Бор-Өндөр   сум   дахь   Сум   дундын   цагдаагийн хэлтэс шалгаж байна” гэлээ.