“Ковид-19”- халдварын эсрэг Арбидол эмийн үнийг зохиомлоор өсгөж байгаа гэх асуудалд ШӨХТГ шалгалт хийсэн. Уг шалгалтын талаар ШӨХТГ-ын дарга Б.Бат-Эрдэнэ мэдээлэл өглөө.

Тэрбээр "Эм, эмнэлгийн хэрэгсэл хяналт зохицуулалтын газраас ирсэн хүсэлтийн дагуу хамтарсан шалгалт хийлээ. Энэ үеэр Арбидол эм 6000 төгрөгөөр худалдан борлуулагдаж байгаагүй нь тогтоогдсон. Цаашид Эм, эмнэлгийн хэрэгсэл хяналт зохицуулалтын газраас эмний үнийг тогтоох зайлшгүй шаардлагатай талаар тухайн байгууллагад албан тоот өгч байгаа. Иймд тогтоосон үнээс дээш төгрөгөөр зарсан тохиолдолд манай байгууллага хяналт тавьж ажиллана.

Хяналт шалгалтад хамрагдсан байгууллагууд дотор 43000 төгрөг хүртэлх үнээр зарж байгаа эмийн сангууд байна. Эдгээр эмийн сангийн тусгай зөвшөөрлийг цуцлуулах, лицензээр оруулж ирэх аж ахуйн нэгжийн жагсаалтаас хасуулах саналаа холбогдох байгууллагуудад хүргүүлсэн. Монос фармийн хувьд уг эмийг 20000 төгрөгөөр оруулж ирээд өөрийн эмийн сангуудад 27270 төгрөгөөр бусад эмийн сангуудад 31000 төгрөгөөр нийлүүлж байгаа нь тогтоогдсон. Ар-Үр компанийн хувьд 18000 төгрөгөөр зах зээлд шууд нийлүүлэх боломжтойгоо албан ёсоор мэдэгдсэн байгаа.

Мөн Монгол Улсын эмийн жагсаалтад вирусийн эсрэг эм ороогүй байгаа боловч багц гэж худалдаалагдаж байгаа төлбөр дүнтэй холбоотой асуудлыг ЭМД-д хамруулах санал хүргүүлээд байна" гэв.

Хяналт шалгалтаар:

• Арбидол эм 2020 он, 2021 оноос худалдаалагдаж эхэлсэн бөгөөд 6000 төгрөгөөр худалдан борлуулагдаж байгаагүй нь тогтоогдсон.
• Эрүүл мэндийн сайдын холбогдох тушаалаар нэг удаагийн импортын зөвшөөрлөөр нэр бүхий 14 компани арбидол эмийг Монгол улсын зах зээлд ковид-19 цар тахалтай холбоотойгоор нийлүүлж байна.
• “Ач Үр” компани нь Арбивир №10 капсултайг 23400 төгрөгөөр эмийн сангуудад нийлүүлдэг бөгөөд өөрийн эмийн сангаар 29000 төгрөгөөр худалдаалж байна. “Мөнхийн тун” компани Арбивир №10 тайг өөрийн 13 эмийн сангаар 32000 төгрөгөөр худалдаалж байгаа бөгөөд бусад эмийн санд нийлүүлээгүй байна.
• “Монос фарм трейд” компани нь Арбидол №20 тойг Моносын Улаанбаатар компанийн эмийн сангуудад 27720 төгрөг, бусад эмийн санд 31500 төгрөгөөр тус тус нийлүүлж байна. Тухайн эмийн сангууд нь 38000-43000 төгрөгийн хооронд худалдаалж байгаа нь тогтоогдсон.
• Амоксиклав 625 мг, Цайр 20 мг, Витамин Д3-4000 тай, Витамин С 1000 тай, Виферон лааны хувьд хил, гаальтай холбоотойгоор тээврийн зардлаас хамаарч үнэ хэлбэлзэж, зарим үед тасарч байгаагаас өөрөөр үнэ хэвийн байна.