Баянзүрх дүүргийн 24 дүгээр хороонд энэ сарын 15-16-нд шилжих шөнө нэг гэр бүлийн дөрвөн хүн угаартаж амиа алджээ. Тодруулбал, өчигдөр өглөөний 09:00 цагийн орчимд цагдаагийн байгууллагад нэг гэр бүлийн хүмүүс нас барсан гэх дуудлага ирсэн байна. Дуудлагын дагуу очиход 69 настай эрэгтэй Н, 67 настай эмэгтэй Н, 10 настай эмэгтэй М, долоон настай эмэгтэй С нар ил харагдах гэмтэл, шархгүй угаартсан байдалтай амиа алдсан байжээ. Цагдаагийн албан хаагчид хэргийн газраас эд мөрийн баримт болгож зуухнаас дутуу шатсан нүүрсний үнс, сайжруулсан сайн түлшнээс дээж авчээ.

Мөн тус өдөр Баянзүрх дүүргийн 19 дүгээр хороонд дахин нэг гэр бүлийн хүмүүс угаартаж амиа алджээ. Тодруулбал, 26 настай эмэгтэй У, найман настай эмэгтэй М, дөрвөн настай эмэгтэй М, нэг нас долоон сартай эмэгтэй М нарын дөрвөн хүн амиа алдсан хэргийг Баянзүрх дүүргийн цагдаагийн хэлтэст шалгаж байна.