Тулгар төрийн 2230, Их Монгол Улс байгуулагдсаны 815, Ардын хувьсгалын 100 жилийн ойн Үндэсний их баяр наадмыг цар тахлын нөхцөл байдалтай холбоотойгоор үзэгчгүй зохион байгуулахаар Засгийн газар шийдвэрлэсэн. Тэгвэл үзэгчтэй зохион байгуулахаар төлөвлөж, бэлтгэл хангаж байсан Үндэсний их баяр наадмыг хэрхэн үзэгчгүй зохион байгуулах гэж байгаа талаар Ардын хувьсгалын 100 жилийн ойн үндэсний баяр наадмын найруулагч Н.Наранбаатараас тодрууллаа.

 Тэрбээр, “Энэ жил олон тэгш ой давхацсан түүхэн жил тохиож байна. Миний хувьд энэ жилийн Үндэсний их баяр наадмын найруулагчаар сонгогдсон. Тиймдээ ч их нямбай хандаж байгаа. Наадмын сценараа гаргаад, энэ сарын 15-нд Наадмын төв комиссоор орсон.

Бидний сценарыг “Сайхан болсон байна” гэж баталсан хэрнээ маргааш нь наадмаа цахимаар зохион байгуулах шийдвэр гаргасан. Одоо бол бүх зүйл нь тодорхойгүй байна. Хэрхэн зохион байгуулах нь ч шийдгүй байна. Уг нь анх 600 сая төгрөг наадмын нээлт хаалтад төсөвлөсөн. Түүнд нь тааруулаад хүн хүчний нөөц, эд материалаа бэлдэж байтал гэнэт ийм шийдвэр гаргасан нь маш хүнд байдалд оруулж байна. Одоо тэр мөнгө санхүү, хүүхэд, багачууд, хүн хүч хаана байгаа юм. Мэдэх юм алга. Өдөр болгон наадмын төв комисс руу утасдаж, цахим наадмаа яаж зохион байгуулах тухай асууж байна. Дээрээс ямар нэгэн чиглэл өгөхгүй байна. Цахим наадмын сценар ч гараагүй байгаа.” гэлээ