"Дэлхийн ур чадвар-Лион 2024" тэмцээний гагнуурын төрөлд 42 эксперт багш 39 оролцогч ур чадвар, мэдлэгээрээ өрсөлдлөө. Тус тэмцээнд Монгол Улсын төлөөлөн Өмнөговь политехник коллежийн суралцагч Б.Чухал оролцсон юм. Тэрбээр эх орноо төлөөлөн тангараг өргөж, “Best of nation" шагналын эзэн болсон билээ. Ингээд шилдэг оролцогч Б.Чухалтай ярилцсанаа танд хүргэж байна.

-Дэлхийн ур чадварын тэмцээнд оролцож “Best of nation" шагналын эзэн болсонд баяр хүргэе. Тус тэмцээнд хэрхэн оролцох болсон талаараа ярихгүй юу?

-Монгол Улсад зохион байгуулагдсан ур чадварын тэмцээнүүдэд оролцсон. "WorldSkills Lyon 2024" тэмцээнийхээ өмнө бэлтгэл болох журмаар Абу-Дабид болон БНХАУ-д болсон нөхөрсөг тэмцээнд оролцсон. Мөн БНСУ-д 14 хоног бэлтгэл хийсэн. Нөхөрсөг тэмцээнүүд нь өрсөлдөгчидтэйгөө танилцаж, сэтгэл зүйгээ бэлдэх зориулалттай байсан. Монгол Улсад болсон гурван шатны тэмцээний хоёрт нь тэргүүлж "WorldSkills Lyon 2024" тэмцээндээ оролцсон.

-"WorldSkills Lyon 2024" тэмцээнд гагнуурчны ур чадвараа сольсон шүү дээ. Яагаад энэ мэргэжлийг сонгосон юм бэ?

-Коллежид гагнуурчнаар сурна гэдэг гэнэтийн шийдвэр байсан л даа. Ер нь их сургуульд элсэн гэж боддог байсан. Коллежид мэргэжил эзэмшсэнийхээ дараа хүсвэл үргэлжлүүлээд их сургуульд сурч болно гэдгийг ахаасаа сонсоод аавтайгаа ярилцаж байгаад гагнуурчнаар сурсан.

-Дэлхийн ур чадварын тэмцээний гагнуурын төрөл ямар үе шаттайгаар явагдав?

-Нийт дөрвөн модуль даалгаврыг 18 цагийн хугацаанд буюу дөрвөн өдрийн турш хийж гүйцэтгэсэн. Энэхүү даалгаврууд нь оролцогчоос өндөр түвшний ур чадвар шаардаад зогсохгүй гагнуурын дөрвөн төрлийг маш олон арга хэлбэрээр ашиглахыг шаарддаг юм билээ. Эхлээд стандарт гагнуурын сорьц буюу ган хавтан болон шугам хоолойг орон зайн сонгогдсон байрлалд гагнуурын  төрлүүдийг ашиглан гагнасан. Дараа нь нүүрстөрөгчит ган сорьц материалуудыг ашиглан даралтат сав гагнаж угсарсан. Гурав дахь даалгавар нь хөнгөн цагаан материалыг ашиглан тусгай хийц зориулалт бүхий бүтээцийг аргон гагнуурын төрөл ашиглан гагнах байсан.Сүүлийн даалгавар нь өмнөх модулийн адил бүтээцийг нерж буюу зэвэрдэггүй ган ашиглан гагнаж угсарсан. Сүүлийн хоёр модуль тус бүр 10 оноотой нарийн мэдрэмж, ур чадвар шаардсан өвөрмөц хийж хийх даалгавар байлаа.

-Таны хувьд хамгийн хүнд даалгавар аль нь байв?

-Бүгд чадвар шаардсан даалгавар байлаа. Тэр дундаас нүүрстөрөгчит ган сорьц материалуудыг ашиглан даралтат сав гагнах жаахан хэцүү байлаа. Саванд 60 баллын даралт өгөх учраас илүү анхааралтай ажиллах хэрэгтэй болсон.

МОНГОЛЧУУД ХУРД, ТЭВЧЭЭР, СЭТГЭХҮЙГЭЭРЭЭ БУСАД ОРОЛЦОГЧООС ЯЛГАРЧ БАЙСАН

-Эх орноо төлөөлж олон өдөр дараалан тэмцээнд оролцохдо сандарсан уу, сэтгэл зүйгээ хэрхэн бэлдсэн бэ?

-Тэмцээнд орохоос хоёр хоногийн өмнө сэтгэл зүйчтэй уулзаж зөвлөгөө авсан. Айдас, сандралаа хэрхэн давах талаар сэтгэл зүйч зөвлөгөө өгсөн учраас тэмцээний үеэр хэт сандарч айгаагүй. Тэмцээний үеэр алдаа гаргасан ч түүндээ бухимдалгүй дараагийн даалгавраа хийсэн.

-Эх орноо төлөөлж "WorldSkills Lyon 2024" тайзан дээрээс тангараг өргөх үед ямар мэдрэмж төрсөн бэ?

-Тангараг өргөнө гэдгээ хоёр сарын өмнө мэдсэн. Гэхдээ тэмцээний бэлтгэлээс болоод төдийлөн цаг гаргаж бэлдэж амжихгүй л байсан. Улаанбаатарт сургалтад суух гэж ирэхдээ илүү цаг гаргаж бэлдсэн. Тэмцээн болох улсдаа ирснийхээ дараа тангараг өргөх хүүхдүүд тайзан дээр гарч бэлтгэл хийсэн юм. Цэнгэлдэх дүүрэн хүн, том тайзан дээр өмнө нь гарч байгаагүй учраас жаахан сандарч, түгдэрсэн. Гэхдээ Монгол Улсаа төлөөлж байгаа учраас түгдэрч, эсвэл цаас харж тангаргаа уншихыг хүсээгүй. Тэр үед сэтгэл зүйчийн зөвлөгөө дэм болсон шүү, тайвшраад үгээ хамгийн сайнаараа үгээ хэлсэн. Тангараг өргөөд зогсож байхдаа өөрөө бага зэрэг бахархсан. Хөдөө орон нутгаас анх удаа дэлхийн ур чадварын тэмцээнд оролцоод зогсохгүй, эх орноо төлөөлж тангараг өргөнө гэдэг нэр төрийн хэрэг байлаа.

-Тангараг өргөж байгаа хүүгээ харсан гэр бүлийнхэн нь их бахархсан байхдаа?

-Аав, ээж маань надаар бахархдаг гэж үргэлж хэлж, урам өгдөг. Сургуульд байхаасаа хичээлдээ сайн, сум, аймгаас зарласан тэмцээн бүрийн шагналт байрт шалгардаг учраас их бахархдаг, надад итгэдэг гэсэн. Улс, аймгийн ур чадварын тэмцээн болдог гэдгийг тэмцээнээс хоёр сарын өмнө мэдэж бэлдэж эхэлсэн.

-Олон улсын оролцогчдоос үлгэр дуурайлал авах зүйл нь юу байв?

-Бусад оролцогчид хамгийн багадаа гурван жил бэлтгэл хийдэг юм билээ. Тэд яг робот шиг сайн гагнаж байсан. Тэрнээс бага хугацаанд бэлтгэл хийсэн хүмүүсийн чадвар тийм ч сайн биш. БНСУ-д очиж бэлтгэл хийх үед тэнд байсан оролцогч “Таван жил бэлтгэл хийгээд ур чадварын тэмцээнд оролцдог. Тухайн хүнийг бэлтгэл хийж байх хооронд дараа жил нь оролцох хүүхэд бэлтгэлээ эхэлдэг” гэсэн.

-Тэгвэл монгол хүний бусад орны оролцогчдоос ялгарах онцлог нь юу байв?

-Монголчууд хурд, тэвчээр, сэтгэхүйгээрээ ялгарч байсан. Дахиад хоёр жил илүү бэлтгэл хийхэд илүү амжилт гаргах боломжтой санагдсан.

-Ур чадварын тэмцээнд нэг удаа л оролцох эрхтэй юм билээ. Тэгвэл дараагийн тэмцээнд оролцох дүү нартаа ямар зөвлөгөө өгөх вэ?

-Оролцож үзсэн хүний хувиар “Ингэж хий” гэж заахаас илүүтэйгээр сэтгэл зүйгээр нь дэмжинэ гэж бодсон. Тэмцээний цаг эхлэхэд нүд цаг руу л хараад байдаг юм билээ. Тиймээс бухимдаж, сандрах үедээ сэтгэл зүйгээ сайн удирдаарай гэж зөвлөнө.

-Үргэлжлүүлэн их сургуульд сурах уу?

-Их сургуульд сурах талаар бодож байгаа. Гэхдээ одоохондоо ямар мэргэжлээр сурахаа шийдээгүй байгаа.