“Гэгээн алсын одод” шоуны Гран При шагналт Э.БЯМБАЖАВ: Хүсэл мөрөөдлөө биелүүлэхээр 12 жилийн дараа урлагийн тайзнаа эргэн ирсэн

Э. Энхмаа:
Ярилцлага- Шинэ үе

2023-06-01, 5817

“Гэгээн алсын одод” шоу нэвтрүүлгийн тайзнаа “Ээж тандаа” дууг дуулж, олон хүний хайр, хүндэтгэлийг хүлээж байсан хүү хэдийнэ 23 настай болжээ. Тэр бол Эрдэнэбатын Бямбажав юм. Зургаан настайгаасаа урлагийн тайзан дээр гарч, өөрийн дуу хоолойгоор түмэнд танигдсан ховорхон уран бүтээлчдийн нэг. Бага байхын л сахилгагүй, хөдөлгөөнтэй сэргэлэн хүү байсан тэрбээр өсвөр наснаасаа дуулах нь ховор болж, хөндийрсөн ч сэтгэлд дотор оршдог хүсэл мөрөөдлөө биелүүлэхээр урлагийн тайзнаа эргэн иржээ. Шинэхэн уран бүтээлч гэх тодотголоор танигдаж буй түүнийг энэ удаагийн шинэ үе буландаа онцоллоо.

-Таныг “Гэгээн алсын одод” шоу нэвтрүүлэгт орсон бяцхан дуучин хүүгээр хүмүүс таньдаг болсон. Хэзээнээс дуулах дуртай болсон юм бэ?

-Манай гэр бүлийнхэн дуулдаг, хөгжим тоглочихдог хүмүүс байдаг. Урлагийн сонирхолтой хүмүүсийн дунд байхаар өөрийн эрхгүй дуулдаг болчихдог юм билээ. Гэр бүлийнхнийхээ тусламжтайгаар өөрт байгаа суурь чадвараа нээсэн гэхэд буруудахгүй байх. Харин жаахан авьяасыг минь илүү нарийн мэргэжлийн төвшинд заасан хүн бол Сүхбаатарын нэрэмжит “Жанжин клуб”-ийн багш С.Мөнхсайхан юм. Зургаан настайгаасаа тус дугуйланд хамрагдсан нь “Гэгээн алсын одод” шоу нэвтрүүлэгт амжилт гаргахад тусласан байх гэж боддог. Юугаа ч мэдэхгүй сонссон аяараа дуулчихдаг байсан хүүхдийг өнгө салгах, хоолойгоо хэрхэн арчлах гэх мэт анхан шатны бөгөөд хамгийн чухал зөвлөгөөг өгч байж билээ. Тус нэвтрүүлэгт орсон түүх нь их сонирхолтой. Манай хамаатны нэг ах өөрийгөө бүртгүүлэхдээ намайг давхар бичүүлчихсэн байсан. Эхний шатанд ороод их сандарч байсан. Уг нь бол ангидаа чанга дуутай, айж сандардаггүй хүүхэд байсан ч том тайзан дээр өөрийн эрхгүй сандраад байдаг юм билээ. /Инээв/ Өөрийгөө түрүүлнэ гэж огт бодоогүй. Тухайн үедээ хүүхэд байсан болохоор үнэхээр их баярлаж, урам зориг авч байсан.

-Та урлагт дуртай гэр бүлд хүмүүжсэн гэлээ. Бага насныхаа тухай яриа дэлгээч?

-Ээж минь эхээс зургуулаа. Бүгд гоё дуулдаг. Манай аав ч бас урлагт нугасгүй. Хоршоод л дуулдаг тийм л хүмүүс. Би айлын том нь, дөрвөн сайхан дүүтэй. Ер нь эмээ, өвөөгийнхөө гэрт хүмүүжсэн. Одоо ч гэсэн тэд минь миний хамгийн том дэмжигчид байдаг. Хүүхдийг бага байхаас нь хүсэж буй зүйлд нь дэмжихээр амжилт гаргадаг гэдэгт би итгэдэг. 11-хэн настай хүүхэд орон даяар зохион байгуулагдаж буй том тэмцээнд түрүүлнэ гэдэг үгээр хэлэхийн аргагүй амжилт. Миний бодлоор магад үгүй надад жаахан авьяас байсан байх. Харин намайг дэмжиж, чадна гэж итгэж, зааж сургасан багш, гэр бүлийнхэн минь байсан болохоор финалын шатанд сандралгүй, Бөхийн өргөөний тайзан дээр өөрийнхөөрөө дуулж түрүүлсэн байх гэж боддог доо.

-“Гэгээн алсын одод” шоу нэвтрүүлэгт түрүүлсний дараа өөрчлөлт гарсан зүйл бий юү?

-Сургуулийн урлагийн үзлэг, дугуйлангийн тэмцээн зэрэг уралдаанд оролцож байсан хүүхэд том тоглолтуудад оролцдог болсон. Ер нь тухайн үедээ сургуулийн ч тэр клубын нүүр царай болсон./Инээв/ Анхандаа ичээд, өөрийнхөөрөө байж чаддаггүй байсан. Тэгээд бага багаар сандралгүй болсон. Мөн тайзан дээр олон хүний өмнө өөртөө итгэлтэй байхыг суралцсан. Нэг хэсэгтээ л тоглолт алгасахгүй оролцдог байсан. Энэ нь олон хүн таньдаг болсонтой холбоотой байх. Магадгүй тухайн үед би түрүүлээгүй бол дахин дуулах хүсэл төрөхгүй ч байж мэднэ. Яагаад гэвэл миний хоолой байдаг л нэг хоолой, бусдаас ялгарах зүйлгүй гээд л явах байсан. Энэ тэмцээн нь надад өөртэй итгэх итгэлийг нэмэгдүүлсэн.

Сургуулийн урлагийн үзлэг, дугуйлангийн тэмцээн зэрэг уралдаанд оролцож байсан хүүхэд том тоглолтуудад оролцдог болсон. Ер нь тухайн үедээ сургуулийн ч тэр клубын нүүр царай болсон

-Тус тэмцээний шүүгчид таныг “Дуучин болох ховорхон авьяастай хүү” хэмээн хэлж байсан. Яагаад дуу хөгжмөөс хөндийрөх болов?

-Би ч бас өөрийгөө дуучин болох байх гэж бодож байсан. Арван жилээ төгсөөд СУИС-д суралцах хүсэлтэй байсан. Гэхдээ чадаагүй. Тухайн үед боломж, бололцоо нь бүрдээгүй. Амьдралын эрхээр барилгачин, зөөгч, туслах ажилтан гээд бүхий л ажлыг хийж үзсэн. Гэсэн ч надад дуулаагүй өдрүүд ховор. Ер нь л нийтэд гарч дуулахаа больсон ч, сэтгэл дотроо үргэлж дуулдаг байсан. Мөн 14 настай байхдаа “Авьяаслаг монголчууд” шоу нэвтрүүлэгт ороод гуравдугаар шат хүртлээ явсан. Тухайн үед намайг дараагийн шатанд тэнцүүлээгүй шалтгаан нь “Ээж тандаа” гээд өмнө нь өөр тэмцээнд дуулсан дуугаараа оролцсон гээд хассан. Тэгээд л тэрнээс хойш уралдаан тэмцээнд оролцмооргүй санагдах болсон. Эрэгтэй хүүхдүүд өсвөр насандаа хоолойд нэлээн өөрчлөлт ордог юм билээ. Миний хувьд ч бас хоолойд эрс өөрчлөгдсөн. Дээд, доод аль ч өнгөө авч чадахгүй болчихсон. “Ингээд л дуучин болох хүсэл минь өнгөрлөө” гэж боддог байсан. Яалт ч үгүй өсвөр насандаа дуу хөгжмөөс хөндийрсөн. Одоо миний хоолой тогтворжиж, харьцангуй дээрдсэн.

-12 жилийн дараа дуулах болсон шалтгаан?

-Миний хамгийн том дэмжигч бол эмээ минь. Зургаан настайгаас минь өнөөдрийг хүртэл дэмжиж, дуртай зүйлд нь амжилт гаргах боломжийг бүрдүүлэх гэж өөрийгөө умартдаг хүн дээ. Энэ л миний 12 жилийн дараа дуулах болсон хамгийн том шалтгаан. Надад хийхийг хүссэнээ хийж амьдрах сонголт байсан ч тэгэж явахыг хүссэнгүй. Өөрийн амьдралын үнэт цагаа миний төлөө зориулсан хүмүүсийн төлөө хичээх нь чухал учраас. Намайг тайзан дээр байхад эмээ минь ямар их баярладаг гээч. Одоо ч хэвээрээ. Энд, тэндхийн “Дууны тэмцээнд ор, очиж дуул” гэж надад тушаана, эмээ. Харин би очихоосоо очихгүй нь их. Хэдий хүртэл хамт байгаа билээ. Хамтдаа оршиж буй энэ үедээ эмээгийнхээ ачийг хариулах хүсэлдээ хөтлөгдөж явна даа. Дуулах бол миний хамгийн сайн чадах зүйл гэдгийг мэдсэн болохоор л өөрийгөө умартаж дэмждэг байх.

Миний хамгийн том дэмжигч бол эмээ минь. Зургаан настайгаас минь өнөөдрийг хүртэл дэмжиж, дуртай зүйлд нь амжилт гаргах боломжийг бүрдүүлэх гэж өөрийгөө умартдаг хүн дээ

-Та хэдхэн хоногийн өмнө “Ээж тандаа” дуугаа дахин дүрсжүүлэн дуулсан байсан?

-Тэгсэн. Яагаад тэр дууг дуулах болсон бэ гэвэл удахгүй “Эх үрсийн баяр” болох гэж байна. Нийт сайхан ээжүүддээ зориулан дуулсан. Мөн би энэ дууг дуулж олон хүнд танигдаж байсан учраас 12 жилийн дараа ахин нэг амилуулахыг хүссэн юм. Энэхүү уран бүтээлийг хийхэд хамгийн их дэмжсэн Ая зохиогч, дуучин Н.Баасандорж ахдаа баярлаж явдаг. Мэргэжлийн хүн биш, олон жилийн дараа дахин дуулж байгаа учир үнэ цэнтэй, мэргэжлийн зөвлөгөө өгч байгаа нь надад том тус болж байна.

-Ая зохиогч, дуучин Н.Баасандоржтой хэрхэн холбогдсон бэ?

-Өмнө нь 2012 онд “Хүүхэд морь хоёр” дууг дуулж байхад ая зохиогчоор Н.Баасандорж ах ажиллаж байсан. Хэсэг хугацаанд холбоогүй байж байгаад хэдэн сарын өмнө холбогдоод “Би дуулах хүсэлтэй байгаа юм. Танаар хоолойгоо хянуулмаар байна” гэж хэлэхэд нээлттэй хүлээж авсан. Тэгээд л хоолойгоо шалгуулсан чинь “Ээж тандаа дуугаа дахин нэг дуулаад үзвэл ямар вэ” гэсэн. Одоо бид цоо шинэхэн уран бүтээл дээр ажиллаж байгаа. Удахгүй үзэгч, сонсогчдын хүртээл болгоно.

-Өнгөрсөн хугацаанд юу хийж байв?

-Мэргэжлийн сургуульд сураагүй ч дуулах хүслээ орхиогүй. 2017 оноос арван жилээ төгсөөд Өвөрмонгол явсан. Очоод зоогийн газарт Монгол зохиолын дуу дуулах ажил хийж байсан. Тэгээд 2018 онд эх орондоо ирээд цэрэгт нэг жил явсан. 2019 онд ирчихээд уран бүтээл хийнэ гэж бодож байтал "Ковид19" гарч гэрээс гарахгүй хөл хорионд орсон. Энэ оноос л хүсэл мөрөөдлөө биелүүлэхээр төвлөрч байна даа.

-Цэрэгт явах ямар санагдсан бэ. Эх орондоо ирээд удаагүй байхдаа явсан байна шүү дээ?

-Цэрэгт явсан түүх нь их хөгжилтэй. 2017 онд надад цэргийн зарлан ирсэн. Би бүтэн нэг жил эрх чөлөөгүй яаж байх вэ дээ гэж бодоод зугтаагаад хөдөө ажлаар явчихсан. Зарлангийн хугацаа дуусмагц буцаад Улаанбаатарт ирсэн. Тэгсэн 2018 манай эмээ надад 2017 оны хуучин цэргийн зарланг өгснөө “Энэ жил цэргийн зарлан дахин чамд ирсэн. Миний хүү цэрэгт яваарай” гэсэн. Хариуд нь би “Эмээ энэ өнгөрсөн жилийн зарлан байна” гэхэд урдаас “Цаасаа хэмнээд хуучин зарлангаа өгсөн” гэсэн. Тэгэхээр гэнэт миний шар хөдлөөд хороон дээр очоод өөрийн хүсэлтээр бүртгүүлээд цэрэгт явсан түүхтэй. Очоод эхний дөрөв хоног “Би юу хийчих вэ ээ” л гэж бодсон шүү. Удалгүй нэгэнт л миний сонгосон сонголт учраас дасан зохицох ёстой гэж бодох болсон. Бүх зүйл нь тогтсон цагт зохион байгуулагддаг дэгтэй газарт очихоор эхэндээ яалт ч үгүй хэцүүддэг юм билээ. Гэхдээ цэргийн албанд явсандаа баяртай байдаг.

-Хүн бүрд шантрах үе байдаг. Таны хувьд шантарсан үедээ юунаас урам зориг авдаг вэ?

-Энэ асуултыг асуусан чинь санаанаас огт гардаггүй дурсамж бодогдож байна. Түүнийгээ хуваалцъя. Би дөнгөж 7-8 дугаар ангийн хүүхэд байсан. Тухайн үед өвөөгийн гэр сургууль хүртэл гурван км газрын зайтай байдаг байлаа. Автобусанд том хүн 200 төгрөг, хүүхэд 100 төгрөг төлж суудаг. Манай эмээ намайг өвөл, зун өглөө оройгүй сургуулиас авдаг. Сургуулиас авах болгондоо эмээ өөрийнхөө автобусны мөнгөөрөө надад иштэй чихэр авч өгчихөөд, намайг автобусанд суулгаад явуулчихдаг байсан. Жаахан байсан болохоор яагаад эмээ минь хамт явдаггүй юм бол гээд их гайхдаг байсан. Одоо бодоход "Намайг дааруулахгүй, харих хүртлээ амттай юм идэг дээ" гэж бодож өөрөө тэсгэм хүйтэн, халуун зун ч хамаагүй алхчихдаг байсан байгаа юм. Энэ их хайрыг нь хүртсэн би яаж ч бууж өгөх билээ дээ. Хэрэв шантармаар, үнэхээр хэцүү санагдвал эмээтэй утсаар яриад л дотор уужирчихдаг. Надад зориулсан сэтгэлийг нь бүгдийг нь биш юмаа гэхэд жаахныг ч хамаагүй мэдрүүлэхийг хүсдэг.

-Бидний урилгыг хүлээн авсан танд баярлалаа. Цаашдын уран бүтээлд нь амжилт хүсье.

-Баярлалаа. Та бүхний ажилд амжилт хүсье. Хэвлэлд яриа өгөөгүй арав гаруй жил болсон байна. Уран бүтээл туурвиж эхэлснээс хойш анхны ярилцлага өгсөн нь танай сайт байлаа. Удахгүй сайхан уран бүтээлүүдээр үзэгч, сонсогчидтойгоо уулзана гэж найдаж байна.

“Гэгээн алсын одод” шоуны Гран При шагналт Э.БЯМБАЖАВ: Хүсэл мөрөөдлөө биелүүлэхээр 12 жилийн дараа урлагийн тайзнаа эргэн ирсэн

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 11

Сэтгэгдэл үлдээсэн: 2023-06-02 08:15:45

С.Жамъяндагва.: Дүүдээ амжилт.Сайхан уран бүтээлээр учиран золгохын ерөөл тавьж бүх ард түмнийхээ сонорыг нь мялааж яваарай.Эмээ ээж аав нь болон гэр бүлд нь сайн сайхан бүхнийг хүсэн ерөөе.Ажээ ажээ амжилт дүү минь.
Сэтгэгдэл үлдээсэн: 2022-05-30 22:39:10

Tseegii tseegii: Уран бүтээлээ хаялгүй эргэж ирсэнд туйлаас их баяртай.Сайхан сайхан уран бүтээл гаргаж үзэгч түмнийхээ сонорыг мялааж яваарай дүү минь.Амжилт хүсье
Сэтгэгдэл үлдээсэн: 2022-05-29 08:33:53

7-: 8 настай байсан бхйхаа
Сэтгэгдэл үлдээсэн: 2022-05-26 20:04:31

Д Баярмаа : Хайртай хүүдээ маш их баярлаж явдаг шүү уран бүтээлд н өндрөөс өндөр амжилт хүсье олон сайхан дуугаар олон түмнээ бярлуулж яваарай
Сэтгэгдэл үлдээсэн: 2022-05-25 17:35:46

[email protected]: duudeee amjilt xusie mundag duu dee duund ni durtai
Сэтгэгдэл үлдээсэн: 2022-05-25 16:41:40

Түмээ: Мундаг.чи.шүү.
Сэтгэгдэл үлдээсэн: 2022-05-25 14:45:52

ariun jargal : vnheer unhaantai mundag saihan duuldag hvv shvv emeeden blon ger bvlden az jargal ervvl enhiig hvsii uralgiin ondor amjilt
Сэтгэгдэл үлдээсэн: 2022-05-25 14:45:51

ariun jargal : vnheer unhaantai mundag saihan duuldag hvv shvv emeeden blon ger bvlden az jargal ervvl enhiig hvsii uralgiin ondor amjilt
Сэтгэгдэл үлдээсэн: 2022-05-25 14:45:50

ariun jargal : vnheer unhaantai mundag saihan duuldag hvv shvv emeeden blon ger bvlden az jargal ervvl enhiig hvsii uralgiin ondor amjilt
Сэтгэгдэл үлдээсэн: 2022-05-25 10:39:31

Uchral: Mundag zaluu shvv amjilt husie
Сэтгэгдэл үлдээсэн: 2022-05-25 10:32:54

Erdenebayr : Mundag duuchin goych xooloitoi shvv mundag dvvdee uran bvteeliin amjilt xvsie

Шинэ мэдээ

Нийтлэлчид