-Дундын цэгт халдвар хамгааллын үнэлгээ хийж байгаа-

Замын-Үүд, Эрээний хилийг энэ сарын 10-наас нээгдэж, ачаагүй тээврийн хэрэгслүүд дундын цэгт орж эхэлсэн. Тэгвэл өнөөдөр “Эрээний хилийг дахин хаасан” гэх мэдээлэл цахим сүлжээнд тархаад байна. Үүнтэй холбоотойгоор Гадаад харилцааны дэд сайд Б.Мөнхжингөөс тодрууллаа.

Тэрбээр “Би арванхоёрдугаар сарын 8-ны өдөр боомт дээр ажиллаж, туршилтуудыг хийсэн. Тухайн үед энэ сарын 10-ны өдөр хил нээгдэнэ гэх мэдээлэл өгсөн. Гэхдээ би үе шаттайгаар ажлууд явагдана гэж хэлсэн.

          Арванхоёрдугаар сарын 10-11-нд Эрээний талаас “Ковид-19” гарахаас өмнө хязгаарлалтад орсон байсан тээврийн хэрэгслүүдийг дундын цэг рүү оруулсан. Харин өнгөрсөн бямба болон ням гарагийн үдээс өмнө Монголын талын жолооч нар орж, дундын цэг дэх техник, тээврийн хэрэгслүүдийг гаргасан. Үдээс хойш нь дундын цэгт ариутгал, халдваргүйжүүлэлт хийсэн юм.

          Өнөөдөр юу болж байгаа вэ гэхээр, нэгэнт дундын цэгт монгол жолооч нар орсон учир Эрээний Онцгой комиссын журмын дагуу дундын цэгийг халдвартай бүс гэж үзсэн. Тиймээс одоо дундын цэгт халдвар хамгааллыг үнэлэх үнэлгээ хийгдэж байгаа юм. Өнгөрсөн өдрүүдэд дундын цэгт хийсэн ажлын үеэр халдвар хамгааллаа баримталж чадсан эсэхийг нь шалгах ажлыг өнөөдөр, маргааш зохион байгуулна. Үнэлгээнээс гарсан дүгнэлтэд халдвар хамгааллын дэглэм сул байна гэсэн хариу гарсан тохиолдолд хилийг хаахын тулд Хөххотоос зөвшөөрөл авах хэрэгтэй.

          Аравдугаар сарын 13-наас хойш 50-60 хоног хаалттай байсан хилийг нээлгэх нь хамгийн чухал зорилт. Хэзээ нээгдэх эсэх нь тодорхойгүй байсан хилийг энэ сарын 10-наас нээсэн” гэв.