Парисын тэнгэрт Монгол Улсын төрийн далбаа мандаж, төрийн дуулал эгшиглэн, эх орон минь дахин нэг олимпын аваргатай боллоо. Алтан медалиа гартаа атгаад нандигнан харж байгаа У.Сүрэнжавын харц олон зүйлийг илэрхийлж, түүнд болон монголчуудад энэхүү алтан медаль ямар үнэ цэнтэй гэдгийг мэдрүүлж байна. “Парис 2024” паралимпын наадам түүний оролцож буй анхны олимп. Тэр 24 насандаа олимпын анхны алтан медалиа хүртлээ.

       Тэрбээр 2000 онд Завхан аймгийн Тосонцэнгэл суманд төрсөн. 11 дүгээр ангийн сурагч байхаасаа таеквондогийн спортоор хичээллэж эхэлжээ. ОУХМ У.Сүрэнжавын анхны багш нь Завхан аймгийн Улиастай  хотын харьяат цагдаагийн дэслэгч, дэлхийн аварга С.Будхүү юм. Завхан аймгийн аварга шалгаруулах тэмцээнээс анхны медалиа хүртэж байсан тэрбээр өнөөдөр олимпын алтан медальтан боллоо.

       Уламбаярын Сүрэнжав паралимпын наадмаас алтан медаль хүртсэн Монголын гурав дахь тамирчин бөгөөд эх орондоо паралимпын тав дахь медалийг авчирч байна. У.Сүрэнжав нь 2023 оны ДАШТ-ий хүрэл, Азийн АШТ-ий алт, хүрэл медальтай, “Ханжоу-2023” Азийн наадмын мөнгөн медальт тамирчин юм.

ТҮҮНИЙ ГАРГАСАН АМЖИЛТ

• Дэлхийн аварга шалгаруулах тэмцээнээс 2023 онд хүрэл
• Азийн аварга шалгаруулах тэмцээнээс 2018 онд хүрэл, 2024 онд алт
• Европын аварга шалгаруулах тэмцээнээс 2024 онд алт
• Азийн наадмаас 2023 онд мөнгө
• Дэлхийн чансаа олгох цуврал тэмцээнээс 2023 онд хоёр алт, 2023 онд хүрэл, 2024 онд мөнгө
• Олон улсын Гранпри тэмцээнээс 2023 онд мөнгө, алт хүртэж байв.