Азийн аварга шалгаруулах сагсан бөмбөгийн 3х3 төрлийн тэмцээн Сингапур Улсад  зохион байгуулагдаж, манай улсын баг хос хүрэл медаль хүртсэн билээ.Монгол Улсын сагсан бөмбөгийн 3х3 шигшээ маань энэ жил бүрэлдэхүүндээ өөрчлөлт оруулан Азийн аваргад оролцсон. Тухайлбал, өмнөх шигшээ багийн бүрэлдэхүүнийг А.Ананд оролцож, багийн ахлагчийн үүрэг  гүйцэтгэсэн. Мөн шинэ бүрэлдэхүүнд “Хасын Хүлэгүүд” багийн тамирчин А.Азбаяр, Ч.Тэмүүлэн, С.Биндэръяа нар багтаж, эх орондоо Азийн аваргын хүрэл медалийг авчирлаа.

        Шигшээ багын ахлагч А.Ананд 1997 оны дөрөвдүгээр сарын 14-нд төрсөн. Түүний тамирчны замнал “ТLG-13” клубээс эхэлсэн түүхтэй.А.Ананд, 2019 онд Япон Улсын “Жобу” их сургуульд олон улсын бизнесийн чиглэлээр сурч байх хугацаандаа Японы хоёрдугаар дивизионд өрсөлддөг “Жобу” их сургуулийн багт гарааны тоглогч байв.  Энэ үед “Хагуро” сургуулийн нэрийн өмнөөс Японы сурагчдын лигт өрсөлдөхдөө 28 оноо, самбараас бөмбөг авалт 19, оновчтой дамжуулалт ес, бөмбөг таслалт дөрвийг дунджилсан байдаг. Мөн тухайн үедээ “Ямагата Ничидай” сургуулийн эсрэг хийсэн тоглолтын турш 45 оноо авч Японыг шуугиулсан юм.

         Түүний дараа “Улаанбаатар ММС Энержи” багт тоглохын тулд их сургуулиа гуравдугаар курсээсээ орхиж, эх орондоо иржээ. Японы сурагчдын лигт гялалзаж явсан түүнийг эх орондоо ирэхэд хамгийн чухал нөлөөлсөн хүн МУГД С.Тулга аж. Учир нь А.Ананд 13 настайдаа “Sprite” лигт тоглож байхад нь С.Тулга багш анзаарсан гэдэг. 

            Япон Улсыг зорихоосоо өмнө С.Тулга багшийнхаа удирдлагад дөрвөн жил хичээллэж,  өсвөр үеийн УАШТ-ийн шилдэг тоглогчоор удаа дараа тодорч, 2013 онд насныхаа ангилалд шилдэг тамирчнаар шалгарч байв.  Ингээд эх орондоо ирээд удаагүй байтал А.Ананд 2019 онд Дэлхийн аварга шалгаруулах “FIBA 3x3” тэмцээнд эх орноо төлөөлөн оролцож эхэлсэн билээ.

Монгол Улсын шигшээ багын ахлагч А.Анандад амжилт хүсье.