• Өнөөдөр 2024-04-15

ТАНИЛЦ: МОНГОЛ УЛСЫН ШИГШЭЭ БАГИЙН ТАМИРЧИД

2024-04-01,   352

       Азийн аварга шалгаруулах сагсан бөмбөгийн 3х3 төрлийн тэмцээн Сингапурт  зохион байгуулагдаж, манай улсын тамирчид хос хүрэл медаль хүртлээ. Монгол Улсын шигшээ баг энэ жил бүрэлдэхүүндээ өөрчлөлт оруулан оролцсон билээ. Шинэ бүрэлдэхүүнд “Хасын Хүлэгүүд” багийн тоглогчид болох А.Азбаяр, Ч.Тэмүүлэн, С.Биндэръяа нар багтсан. Харин А.Ананд өмнөх бүрэлдэхүүнээс оролцож, багийн ахлагчаар ажиллалаа.  Өнгөрсөн жилийн шигшээ багт А.Ананд, Д.Дэлгэрням, Э.Дөлгөөн, О.Энхбаатар нар багтаж байсан билээ.

Тэгвэл бид энэ удаад эрэгтэй Монгол Улсын шигшээ багийн тамирчдын товч танилцуулгыг бэлтгэлээ.

МОНГОЛ УЛСЫН ШИГШЭЭ БАГИЙН АХЛАГЧ А.АНАНД

          Тэрбээр 1997 оны дөрөвдүгээр сарын 14-нд төрсөн. 196 см өндөр. 80 кг жинтэй. “ТLG-13” клубээс тамирчны замналаа эхэлсэн А.Ананд, 2019 онд Япон Улсын “Жобу” их сургуульд олон улсын бизнесийн чиглэлээр сурч байх хугацаандаа Японы хоёрдугаар дивизионд өрсөлддөг “Жобу” их сургуулийн багт гарааны тоглогч байв. Энэ үед “Хагуро” сургуулийн нэрийн өмнөөс Японы сурагчдын лигт өрсөлдөхдөө 28 оноо, самбараас бөмбөг авалт 19, оновчтой дамжуулалт ес, бөмбөг таслалт дөрвийг дунджилсан байдаг. Мөн тухайн үедээ “Ямагата Ничидай” сургуулийн эсрэг хийсэн тоглолтын турш 45 оноо авч Японыг шуугиулсан юм. Түүний дараа “Улаанбаатар ММС Энержи” багт тоглохын тулд их сургуулиа гуравдугаар дамжаанаас орхиж, Монголдоо иржээ. Японы сурагчдын лигт ийн гялалзаж явсан түүнийг эх орондоо ирэхэд хамгийн чухал нөлөөлсөн хүн МУГД С.Тулга аж. Учир нь А.Ананд 13 настайдаа “Sprite” лигт тоглож байхад нь С.Тулга багш хараандаа авчээ. Япон Улсыг зорихоосоо өмнө багшийнхаа удирдлагад дөрвөн жил хичээллэж,  өсвөр үеийн УАШТ-ийн шилдэг тоглогчоор удаа дараа тодорч, 2013 онд насныхаа ангилалд шилдэг тамирчнаар шалгарч байв.   Ингээд эх орондоо ирээд удаагүй байтал А.Ананд 2019 онд Дэлхийн аварга шалгаруулах “FIBA 3x3” тэмцээнд эх орноо төлөөлөн оролцож эхэлсэн билээ.

МОНГОЛ УЛСЫН ШИГШЭЭ БАГИЙН ТОГЛОГЧ А.АЗБАЯР

            Үндэсний дээд лигт хоёр дахь жилээ тоглож буй А.Азбаяр нь 2005 оны гуравдугаар сарын 28-ны өдөр  Улаанбаатар хотноо төрсөн.  Хоёр эгчтэй, айлын бага хүүхэд, 203 см өндөр. Улсын тэргүүний 84 дүгээр сургуулийг төгссөн. Одоо СЭЗИС-ийн Энтрепренершип хөтөлбөрөөр  нэгдүгээр курст суралцаж байгаа.

           Тэрбээр 2023-24 оны “Roockie of the Year” буюу улирлын шилдэг шинэ тоглогчийн эзэн болсон билээ. Түүний мэргэжлийн сагсан бөмбөгийн замнал дөнгөж эхэлж буй ч тэр чадварлаг тамирчдын тоонд зүй ёсоор багтаж байгаа билээ.   

          А.Азбаяр Зүүн Азийн залуучуудын наадмын алтан медальт, Оюутны шигшээ болон 3Х3 төрлөөрх 18 хүртэлх насны Үндэсний шигшээ багийн тамирчин байсан.  2023 онд “Хасын хүлэгүүд” багтаа зургаан жилийн гэрээ хийсэн.Мөн тэрбээр таеквондогийн олимпын таеквондогийн хар бүс, 2 дантай. Дэлхийн аваргын V байр,  Таеквондогийн Залуучуудын аваргын хүрэл медаль, Таеквондогийн Олон Улсын Хэмжээний Мастер чадварлаг тамирчин юм.

МОНГОЛ УЛСЫН ШИГШЭЭ БАГИЙН ТОГЛОГЧ Ч.ТЭМҮҮЛЭН

        Ч.Тэмүүлэн  нь 2003 онд төрсөн, 195 см өндөр. Рояаль Олон Улсын Их Сургуульд суралцдаг. 3Х3 U21 ангилалын улсын шигшээ, Амгалан багийн тамирчин байсан. Тэрбээр өнгөрсөн онд “Хасын Хүлэгүүд” багтай гурван жилийн гэрээ байгуулсан.

МОНГОЛ УЛСЫН ШИГШЭЭ БАГИЙН ТОГЛОГЧ С.БИНДЭРЪЯА

        С.Биндэръяа 2004 онд төрсөн. Тэрбээр өмнө нь “Ханжоу 2022” Азийн наадмын Монгол Улсын шигшээ багийн бүрэлдэхүүнд багтаж байсан туршлагатай. Мөн өнгөрсөн онд “Хасын хүлэгүүд” багийн бүрэлдэхүүнд багтаж, энэ жил “Дээд лиг”-ийн аварга болсон билээ.

 


ТАНИЛЦ: МОНГОЛ УЛСЫН ШИГШЭЭ БАГИЙН ТАМИРЧИД
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188