Өвөрхангай аймагт энэ сарын 6-8 ны өдрүүдэд Монгол Улсын хөдөлмөрийн баатар, Ардын багш, гавьяат дасгалжуулагч Чимэдбазар Насантогтох багшийн нэрэмжит өсвөр үеийн жүдо бөхийн олон хотын тэмцээн болсон. Тус тэмцээний охидын 57 кг-ын жингийн аварга,тус тэмцээний “Шилдэг тамирчин”-ын шагнал хүртсэн “Монголын жүдо академи”-ийн тамирчин Х.Ариунтунгалагтай ярилцлаа.

-Ч.Насантогтох багшийн нэрэмжит олон хотын тэмцээнээс алтан медаль авч, “Шилдэг тамирчин”-ны шагнал хүртсэнд баяр хүргэе.  Энэ удаагийн тэмцээний алтан медалийн төлөө аль клубийн тамирчин барилдав?

-Баярлалаа.  Насаа багшийн нэрэмжит олон хотын тэмцээнд түрүүлсэндээ баяртай байна. Энэ удаагийн тэмцээний алтан медалийн төлөө Спортын төв сургуулийн Амарцэцэг гэдэг охинтой барилдаж ялсан.

-Танай 57 кг-ын жинд хэдэн бөх барилдав. Хамгийн хүнд барилдааныг ямар бөхчүүдтэй хийсэн бэ?

- Улаанбаатар хотод болдог бусад тэмцээнүүдийг бодвол цөөхөн тамирчид оролцсон.  Энэ удаагийн тэмцээн хөдөө орон нутагт хол газар болсон болохоор харьцангүй цөөн тооны тамирчид оролцсон байх. Манай жинд 15 бөх барилдсан. Тийм хүнд ширүүн өрсөлдөөн өрнөсөн барилдаан бол гараагүй.

 -Миний дүү өөрийгөө танилцуулахгүй юу. Аль сургуулийн хэддүгээр ангид сурдаг вэ?

-Би нийслэлийн ерөнхий боловсролын 48 дугаар дунд сургуулийн аравдугаар ангид сурдаг.

 -Жүдо бөхийн спортоор хичээллээд удаж байгаа юу. Жүдо бөхийг сонирхож эхлэх үед аав, ээж нь эсэргүүцэж байсан уу?

-Жүдо бөхөөр хичээллээд удаж байгаа. Аав, ээж хоёр минь үргэлж намайг дэмжиж, тусалсаар ирсэн. Бэлтгэл, сургуулилалт хийх бүх боломж, нөхцөлийг бүрдүүлж өгдөг.  Эсэргүүцэж, хориглож байсан удаагүй. Харин ч их дэмждэг.

 -Чиний сонирхлыг жүдо бөхийн спортын чухам юу нь татав аа?

-Жүдо бөхийн сонгодог мэх, техникүүд их гоё санагддаг.  Үе тэнгийнхээ хүүхдүүдтэй барилдаж, ноцолдон, тэднийг ялж, ялагдах нь өрсөлдөөнийг бий болгодог. Энэ бүхэнд өөрийн эрхгүй сэтгэл татагддаг.

 -Бэлтгэл, сургуулилалтаа “Монголын жүдо академи”-ийн аль салбар  дээр хийдэг вэ. Хэн багшийн шавь бэ Өдөрт хэдэн цагийн бэлтгэл хийдэг вэ?

--Би бэлтгэлээ  Баянгол дүүргийн III хорооллын Модны хоёрт байрлах “Их шавь” салбарт хийдэг. Миний багшийг Г.Бат-Эрдэнэ гэдэг. Өдөрт 2-3 цагийн бэлтгэл хийж байгаа.

-Жүдо бөхөөр хичээллээд хэдэн жил болж байгаа вэ?

-Жүдо бөхөөр  долоо дахь жилдээ хичээллэж байгаа.

-Миний дүү өөрийгөө хэр бяр тэнхээтэй гэж боддог вэ?

- Би ч өөоийгөө нэг их бяр тэнхээтэй гэж боддоггүй. Гэхдээ бяр, тэнхээтэй болохын төлөө хичээж яваа. Жүдо бөхийн мэх, техникийг сайн эзэмшихийн хажуугаар тодорхой хэмжээний хүч, бяртай байх ёстой.

 -Найз охидууд нь чиний жүдо бөхөөр хичээллэх сонголтыг хэрхэн хүлээн авч байв аа?

- Анх жүдо бөхөөр хичээллэж эхлэхдээ ангийнхаа охидуудад хэлээгүй.  Харин анхны тэмцээнд ороод, анхны медаль хүртэх үед л тэд мэдсэн. Найзууд мэдсэн үеэс хойш үргэлж наймаг дэмжиж улам их урам зориг, эрч хүч хайрлан дэмжих болсон. Одоо  ч дэмжсээр л байгаа.

 -Жүдо  бөхийн спортод хүч чадал, техник ур чадвар чухал ч сэтгэл зүй гол тулгуур болно биз. Тэмцээнд орохын өмнө сэтгэл зүйгээ хэрхэн бэлддэг вэ?

- Сэтгэл зүй маш их чухал нөлөө үзүүлдэг. Сэтгэл зүйгээр өөрийгөө хямраахгүйн тулд аль болох өөрийгөө тайван байлгаж, барилдаандаа төвлөрөхийг боддог.

-Саяхан болж өнгөрсөн насанд хүрэгчдийн УАШТ-д барилдсан уу?

-Насанд хүрэгчдийн улсын аварга шалгаруулах тэмцээний 57 кг-ын жингийн хувийн барилдаанд бол барилдаагүй. Харин багтаа тус нэмэр болох үүднээс багийн барилдаанд хүч сорьсон.

-Өсвөр үе, залуучуудын УАШТ-ийн  хэдэн удаа оролцож, ямар амжилтууд гаргаж байв?

- Жүдо бөхийн өсвөр үеийн улсын аварга шалгаруулах тэмцээнд гурван удаа оролцож байсан. Тэр гурван улсын аваргаас алт, мөнгө, хүрэл медалийг авч байлаа. Харин залуучуудын улсын аварга шалгаруулах тэмцээнд барилдаж үзээгүй.

 - Өсвөр үеийн олон улс, тив, дэлхийн аварга шалгаруулах тэмцээнд оролцож байв уу?

-ОХУ-д болдог өсвөр үеийн  “Рахлийн цом”-ын тэмцээнд л оролцож үзсэн.

-Жүдо бөхийн спортоор хичээллэх хамгийн сайхан нь юу байдаг вэ?

-Жүдо бөхийн бүх зүйл хамгийн сайхан нь шүү дээ. Тэр дундаа  жүдогийн шинэ мэх, техник сурах хамгийн гоё. Барилдах урам зориг авч амжилттай барилдах бүр ч сайхан.