Франц Улсын Парис хотод энэ сарын 4-5-ны өдрүүдэд “Парис 2023” гранд слам тэмцээн болно. Энэ удаагийн их дуулга тэмцээнд 85 орны эрэгтэй 334, эмэгтэй 211, нийт 545 тамирчин барилдах мэдүүлэг өгөөд байна.

       Эрэгтэйчүүдийн 60 кг-ын жинд 38 бөх барилдах мэдүүлэг өгчээ.  Энэ жинд манай улсаас ДАШТ-ий мөнгөн медальт, ОУХМ Э.Ариунболд, Б.Цогт-Очир нар хүч сорих юм. 66 кг-д 55 бөх барилдана. Энэ жинд ОУХМ Б.Эрхэмбаяр, Б.Нармандах нар орно.

         Эрэгтэйчүүдийн 73 кг-д мөн 55 бөх барилдах мэдүүлэг өгсөн байна. Манай улсаас ОУХМ Л. Анхзаяа, О.Уранбаяр нар хүч үзнэ. 81 кг-д 62 бөх барилдах аж. Манай улсын ОУХМ Г.Болор-Очир, Б.Батболд нар барилдана. 90 кг-ын жинд манайхаас бөх барилдахгүй.

        Харин -100 кг-ын жинд ОУХМ Б.Гончигсүрэн барилдах юм. Энэ жинд 41 бөх байна. +100 кг-д ОУХМ О.Цэцэнцэнгэл хүч сорино. Тус жинд 31 бөх барилдах бололтой.

       Эмэгтэйчүүдийн 48 кг-ын жинд ОУХМ Б.Баасанхүү барилдана. Энэ жинд 29  бөх байна. 52 кг-д  ОУХМ Л.Сосорбарам, М.Нандин-Эрдэнэ нар барилдах юм. Энэ жинд 29  бөх байгаа. 57 кг-д ОУХМ М.Ичинхорлоо, О.Оюунчимэг нар хүч үзнэ. Энэ жинд 36 бөх барилдана. 63 кг-д ОУХМ Б.Ганхайч, Д.Есүй нар барилдах юм. Энэ жинд 37 бөх байна.

      Эмэгтэйчүүдийн 70 кг-ын жинд  Б.Ням-Эрдэнэ хүч сорино. Тус жинд 32 бөх барилдах мэдүүлэг өгчээ. -78 кг-ын жинд О.Хүслэн, Б.Эрдэнэт-Од нар барилдах юм. Энэ жинд 27  бөх барилдана. +78 кг-ын жинд Д.Номинзул хүч үзнэ. Энэ жинд 21 бөх барилдах мэдүүлэгийг одоогоор өгсөн байна.