Баянгол дүүрэг өсвөр үеийнхний эрүүл мэнд, бие бялдрын хөгжлийг дэмжих хөтөлбөр эхэллэ. Өсвөр үеийн чөлөөт цагийг нь зөв, үр бүтээлтэй өнгөрүүлэх цаашлаад ерөнхий боловсролын сургууль төгсөж байгаа хүүхэд бүрийг усанд сэлэх анхан шатны мэдлэг, чадвартай болгох зорилгоор дүүргийн ЕБС-ийн 12 дугаар ангийн сурагчдын дунд усан спортын боловсрол олгох хоёр үе шаттай хөтөлбөрийг эхлүүлж байна.

          Нэгдүгээр шатны хөтөлбөрийн эхний ээлжинд буюу нэгдүгээр сард ерөнхий боловсролын 28, 40 дүгээр сургуулийн 12 дугаар ангийн 298 сурагч,  дүүргийн Биеийн тамир, спортын хорооны усан бассейнд, ЭУЦС ахлах, 77дугаар сургуулийн 271 сурагч, Баянгол дүүргийн “Усан спорт сургалтын төв” ОНӨТҮГ-т хичээллэх хуваарь гарлаа. Ирэх VI сар хүртэл хэрэгжих хөтөлбөрийн нэгдүгээр шатанд дүүргийн нутаг дэвсгэрт үйл ажиллагаа явуулдаг ЕБС-иудын 2300 гаруй төгсөх ангийн сурагч усанд сэлэх анхан шатны боловсролтой болох юм. Харин ирэх IX сард эхлэх хоёрдугаар шатны сургалтад төгсөх 12 дугаар ангид шинээр элсэн орох 2000 гаруй сурагчийг шат дараатай хамруулахаар төлөвлөн ажиллаж байна.

         Энэхүү хөтөлбөр хэрэгжсэнээр 2023 онд БГД-т үйл ажиллагаа явуулдаг төрийн өмчийн 19 сургуулийн төгсөх ангийн сурагчид усанд сэлэх анхан шатны чадвартай болж төгсөхөөс гадна хүүхэд, залуус усан спортын мэдлэгтэй болж өөрсдийгөө хөгжүүлэх, цаашлаад элдэв аюулаас урьдчилан сэргийлэх боломж бүрдэнэ гэж үзэж байгаа юм.