Америкийн үндэсний сагсан бөмбөгийн лигийн ээлжит чөлөөт агентын зах зээл удахгүй нээгдэх билээ. Мөн түүний өмнө драфтын үйл ажиллагааг зохион байгуулсны дараа 2020-2021 оны улирлын тоглолтууд албан ёсоор эхэлнэ. Тус лигийн түүхэнд аваргын төлөөх тоглолтоос хойш хамгийн хурдан шинэ улирлыг эхлүүлэхээр болсонд ихэнх тоглогч шүүмжлэлтэй байгаа юм. Харин драфтын сонголт, чөлөөт агентын зах зээл нээгдэхээс өмнө багуудын хийсэн нүүдэл юу байв. АҮСБХ-ны хүрээн дэх онцлох мэдээ, мэдээллийг та бүхэнд хүргэж байна.

Жрю Холидэй “Милоуки Бакс” багт нэгдэв

“Нью Орлеан Пеликанс” багийн бүх одод холбон тоглогч Жрю Холидэй “Бакс” багт солилцоогоор нэгдлээ. Тухайлбал, “Бакс” багийн зүгээс Эрик Бледсо, Жорж Хилл болон ирээдүйн гурван драфтын эрхийн хамтаар “Пеликанс” багтай тохиролцож, наймаа албан ёсоор дуусгавар болсон юм.

Жеймс Харден багаа солих хүсэлтэй байгаагаа илэрхийлжээ

Лигийн супер од Жеймс Харден “Бруклин Нетс” баг руу солилцоонд орох хүсэлтэй байгаа аж. Хэрэв “Хьюстон Рокетс” багийн удирдлагуудын зүгээс түүнийг солилцоонд оролцуулах шаардлагагүй гэж үзвэл тэрбээр ирэх гурван жилд авах 103 сая ам.долларын гэрээнээсээ татгалзаж, “Нетс”-тэй томоохон гэрээ байгуулах гэнэ. Олон жил шигшээ тоглолтдоо хожигдож, аварга авч чадахгүй явсаар залхсан Хардены нүүдэл цагаа олоогүй ч байж болох юм. Хэдийнэ хоёр супер одыг багтаа нэгтгэсэн “Нетс” багаас түүнд санал болгох цалингийн цэс тийм ч өндөр байж чадахгүй.

Крис Пол “Финикс Санс” багт нэгдэв

Өдгөө ахмадуудын эгнээнд багтаад буй хуучны шилдгүүдийн нэг Крис Пол “Санс” багт нэгдлээ. Тус багийн зүгээс Крис Пол болон туслах үүргийн тоглогч Абдель Надер нарын төлөө “Оклахома Сити Тандер” багт Рики Рубио, Келли Оубре Жуниор, Ти Жером, Жален Лекк болон 2022 оны драфтын эхний тойргийн сонголтын эрхийг зарцуулжээ. Жил бүр сайн тоглолтоо үзүүлдэг ч аваргын төлөөх өрсөлдөөнд ордоггүй Крис Пол залуу супер од Девин Бүкертэй нэгдлээ. Ирэх жилийн шигшээ тоглолтын таамгийг тэдний хослол үгүйсгэж ч болох юм.

Роберт Ковингтон солилцоонд орно

Багийн гол тулгуур тоглогч Жеймс Харден солилцоонд орох саналаа гаргаснаар “Хьюстен Рокетс” багийн удирдлагуудын сандаргаад байна. Харин энэ үед тус багийн ерөнхий менежер багийн гарааны тоглогч Роберт Ковингтоныг “Портлэнд Трэйл Блэйзерс” баг руу солилцоонд оролцуулж, туршлагатай хамгаалагч Тревор Аризаг болон ирэх жилийн драфтын эхний тойргийн сонголтын хамтаар солилцох саналтай байгаа аж.

“Милоуки Бакс” Богдан Богдановичийг багтаа нэгтгэлээ

“Сакраменто Кингс” багийн залуу од Богдан Богдановичийг лигийн ихэнх баг онилсон билээ. Тэдэн дундаас “Бакс” багийн удирдлагууд түргэн шаламгай ажиллаж түүнийг солилцоогоор багтаа авчирчээ. Тус багийн зүгээс Богдан Богданович болон Жастин Жеймс нарыг авчрахын тулд Донте ДиВинчензо, Эрсан Ильясова, Д.Ж. Вилсон нарыг ашиглажээ. Өнгөрсөн улирлын аваргын шуумд хэсэг яригдсан “Бакс” баг шувтаргын тоглолтдоо хожигдол хүлээсэн. Харин ирэх улирлаас аваргын цомын төлөө хүч үзэх бололтой.

Хамгийн анхны онлайн драфт

Коронавирусээс урьдчилан сэргийлэх хөл хорионы дэглэмтэй холбоотойгоор энэ жилийн драфтыг онлайнаар зохион байгуулах ажээ. Харин энэ жилийн драфтын дээгүүр сонгогдох магадлалтай гурван тоглогч нь Энтони Эдвардс, Жеймс Виземан, ЛаМело Болл нар юм. Тэдний хэн нь ч драфтын тэргүүн сонголтоор сонгогдох боломжтой ч спортын сэтгүүлч, тоймчдын үзэж буйгаар Энтони Дэвис тэргүүн сонголт байх өндөр магадлалтай гэнэ.